Թուրքիան և ԱՄՆ-ն ընկերներ չեն․ չլուծված խնդիրներ կան․ Չավուշօղլու

Թուրքիայի և ԱՄՆ-ի հարաբերություններում շատ խնդիրներ լուծված չեն։ Այս մասին Hürriyet-ին տված հարցազրույցում հայտարարել է Թուրքիայի արտգործնախարար Մևլութ Չավուշօղլուն, փոխանցում է Gazeta-ն։

«Հարաբերությունները նախկինից ավելի կայուն են դարձել, բայց խնդիրները չեն լուծվել։ Թրամփի օրոք ամեն օր կա՛մ վեր էր, կա՛մ վայր։ Նա թվիթ էր անում և խառնաշփոթ առաջանում»,- ասել է Թուրքիայի արտգործնախարարը։

Նա ընդգծել է, որ ԱՄՆ-ն ու Թուրքիան ընկերներ չեն։

«Հարաբերությունները կարող են զարգանալ նույնիսկ այն ժամանակ, երբ դուք ընկերներ չեք։ ԱՄՆ-ի հետ կապված լուրջ խնդիրներ կան, բայց կան նաև դրական կողմեր։ Մեր առևտուրը կրկնապատկվել է և նույնիսկ զարգանում է մեր օգտին»,- ասել է Չավուշօղլուն։

Թուրք պաշտոնյան հավելել է, որ Վաշինգտոնը շարունակում է աջակցել Քուրդիստանի աշխատավորական կուսակցությանը (PKK-ն Թուրքիայում արգելված է)։

«Սա փոխազդեցություն է ահաբեկչական կազմակերպության հետ։ Իհարկե, խնդիր կա նաև այնտեղ FETÖ-ի (կրոնական քարոզիչ Ֆեթուլլահ Գյուլենի կազմակերպությունը) առկայության հետ»,- ասել է Չավուշօղլուն։

Ավելի վաղ Թուրքիայի ներքին գործերի նախարար Սուլեյման Սոյլուն հայտարարել էր, որ ահաբեկչության դեմ պայքարելով՝ Անկարան իրականում պայքարում է ԱՄՆ-ի դեմ։ Նա նաև ասել է, որ ԱՄՆ-ն «ատում է ամբողջ աշխարհը», իսկ Եվրոպան Վաշինգտոնի «խաղազինվորն» է։

Թուրքիայի ԱԳՆ ղեկավարը նաև մեղադրել է ԱՄՆ-ին իր երկրի կողքին «ահաբեկչական պետություն» ստեղծելու փորձի մեջ։

Տաթև Ֆռանգյան