ԱՄՆ-ը փորձում է հասնել Բրազիլիայից ռուս լրտեսի արտահանձնմանը

ԱՄՆ-ը Բրազիլիային ՌԴ Գլխավոր հետախուզական վարչության աշխատակից Սերգեյ Չերկասովի արտահանձնման հարցում է ուղարկել, որին ամերիկյան իշխանությունները մեղադրում են լրտեսության մեջ։ Այս մասին հայտնում է  The Washington Post-ը, որին վկայակոչում է DW-ի ռուսական ծառայությունը։

Լրատվամիջոցի տվյալներով՝ ԱՄՆ-ի դիմումը քննարկելու է Բրազիլիայի Գերագույն դատարանը, սակայն չի բացառվում, որ «գործի նրբության» պատճառով խնդրի լուծմանը կարող է միանալ նախագահ Լուիս Իգնասիո Լուլա դա Սիլվան։

Ռուսաստանի իշխանությունները նույնպես պահանջում են Չերկասովի արտահանձնումը․ ՌԴ-ում նրա դեմ թմրամիջոցների ապօրինի շրջանառության հոդվածով գործ է հարուցվել։

Միաժամանակ, լրատվամիջոցը գրում է, որ ԱՄՆ-ի և Բրազիլիայի իշխանությունները ռուսական դիմումը համարում են «ակնհայտ հնարք»։ ՌԴ Գլխավոր դատախազությունը փաստաթղթեր է ներկայացրել այն մասին, որ Չերկասովը մի քանի տարի հերոին է վաճառել, սակայն գործի նյութերում կան բազմաթիվ անհամապատասխանություններ, ուստի կասկած կա, որ Չերկասովի դեմ գործը սարքվել է՝ նրա լրտեսությունը չճանաչելու համար։

Հավելենք, որ Չերկասովը ձերբակալվել է Նիդեռլանդներում անցյալ տարվա հունիսին։ Նիդեռլանդների հետախուզության տվյալներով՝ ռուսաստանցին ներկայացել է որպես Բրազիլիայի քաղաքացի Վիկտոր Մյուլեր Ֆերեյրա և փորձել է պրակտիկա անցնել Հաագայի Միջազգային քրեական դատարանում։ Նրան արտահանձնել են Բրազիլիային, որտեղ փաստաթղթերի կեղծման համար նա դատապարտվել է 15 տարվա ազատազրկման։

Էմմա Չոբանյան