24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Լուկաշենկոյի մրցակիցը բանտում դաժան ծեծից հետո հոսպիտալացվել է
Քաղաքականություն
27.04.2023 | 18:34
Ձեռնարկատեր Վիկտոր Բաբարիկոն, որը մտադիր էր մասնակցել Բելառուսի նախագահական ընտրություններին և ներկայում պատիժ է կրում խոշոր չափի կաշառք վերցնելու հոդվածով, կալանավայրից տեղափոխվել է Նովոպոլոցկի հիվանդանոց։ Այս մասին հայտնել են նրա մերձավորները քաղաքական գործչի Telegram-ալիքում, փոխանցում է DW-ի ռուսական ծառայությունը։
«Ընկերնե՛ր, երեկ լուրեր էին տարածվել, որ Վիկտոր Բաբարիկոն գտնվում է Նովոպոլոցկի հիվանդանոցում: Մեզ հաջողվեց հաստատել այս տեղեկությունը: Ցավոք, այլ մանրամասներ դեռ հայտնի չեն»,- ասվում է հաղորդագրության մեջ:
Մերձավորները հայտնել են նաև, որ Բաբարիկոյի հետ գրավոր նամակագրություն չի եղել շուրջ 2 ամիս։ Վերջերս նա անընդհատ պատժախցում է եղել։
Բաբարիկոյի հոսպիտալացման մասին տեղեկությունները սկսել էին հայտնվել նախօրեին։ Հաղորդվում էր, որ քաղաքական գործչին հիվանդանոց են տեղափոխել այնպիսի դաժան ծեծի հետքերով, որ նրան չեն էլ ճանաչել, մինչև չեն տեսել ազգանունը։
Նովոպոլոցկի հիվանդանոցից հաստատել են, որ Բաբարիկոն տեղափոխվել է վիրաբուժական բաժանմունք և վիրահատվել։
Վիկտոր Բաբարիկոն Բելգազպրոմբանկի նախկին ղեկավարն է։ Նա ձերբակալվել է 2020 թվականի հունիսին։ Այդ ժամանակ բանկիրը փորձում էր գրանցվել նախագահական ընտրություններում որպես թեկնածու, որոնցում ավտորիտար առաջնորդ Ալեքսանդր Լուկաշենկոն առաջադրվում էր վեցերորդ անգամ անընդմեջ։ Ձերբակալությունից երեք օր առաջ իշխանություններն իրենց վերահսկողության տակ էին վերցրել «Բելգազպրոմբանկ»-ը՝ խարդախության կասկածանքով կալանավորելով բանկի բարձրագույն ղեկավարությանը։ Ձերբակալվել է նաև բանկիրի որդին։
Տաթև Ֆռանգյան
