Քաղաքականություն
27.04.2023 | 15:00
Կրեմլում տեղյակ չեն Թուրքիայի նախագահ Ռեջեփ Թայիփ Էրդողանի առողջական խնդիրներից, այսօր ՌԴ նախագահ Վլադիմիր Պուտինը ծրագրում է հեռախոսազրույց ունենալ նրա հետ։ Այս մասին լրագրողներին ասել է ՌԴ նախագահի մամուլի խոսնակ Դմիտրի Պեսկովը, գրում է ՏԱՍՍ-ը։
«Մենք ոչինչ չգիտենք այդ «դժվարությունների» մասին: Մենք այսօր պատրաստվում ենք հեռախոսազրույցի և երկու նախագահների միջև բովանդակալից շփման»,- ասել է Պեսկովը՝ պատասխանելով հարցին՝ արդյո՞ք Մոսկվան պատրաստ է առաջարկել իր բժիշկների օգնությունը Էրդողանի առողջական դժվարությունների վերաբերյալ ԶԼՄ-ներում հրապարակումների ֆոնին։
Պեսկովը հայտնել է, որ Պուտինի և Էրդողանի հեռախոսազրույցը սպասվում է տեղական ժամանակով 15։00-ին՝ «Աքքույու» ատոմակայանի միջոցառումից առաջ։
«Մենք սպասում ենք Պուտինի և Էրդողանի հեռախոսազրույցին մոտավորապես ժամը երեքին»,- ասել է Կրեմլի խոսնակը։
Նա նշել է, որ դրանից հետո Պուտինը Թուրքիայի նախագահի հետ համատեղ տեսակապով մասնակցելու է «Աքքույու» ատոմակայանի թիվ 1 էներգաբլոկի միջուկային վառելիքի բեռնման արարողությանը։
Հավելենք, որ նախօրեին թուրքական լրատվամիջոցները հայտնել էին, որ Էրդողանը նույնպես տեսակապով է մասնակցելու ատոմակայանի միջոցառմանը։ Բացի այդ, չհաստատված լուրեր էին շրջանառվում, որ Էրդողանը սրտամկանի կաթված է ստացել ու գտնվում է հիվանդանոցում՝ ծանր վիճակում։ Այս տեղեկությունը, սակայն, հերքել են Թուրքիայի նախագահականը, ինչպես նաև փոխնախագահ Ֆուադ Օքթայը։
Հիշեցնենք, որ Էրդողանի ինքնազգացողությունը վատացել էր Kanal 7-ի և Ulke TV-ի համատեղ ուղիղ եթերում հարցազրույցի ժամանակ, որի պատճառով հեռարձակումը դադարեցվել էր։ Եթեր վերադառնալուն պես Էրդողանն անդրադարձել էր իր առողջական խնդիրներին՝ նշելով, որ ինտենսիվ քարոզարշավի պատճառով ստամոքսի հետ կապված խնդիրներ ունի։ Երեկվա նախընտրական հանդիպումներն էլ Էրդողանը չեղարկել էր «բժիշկների խորհրդով՝ տանը հանգստանալու համար»։ Այսօրվա հանդիպումները ևս չեղարկվել են։
Էմմա Չոբանյան
