15.08.2026 | 12:59
Վթար Վայոց ձորի մարզում․ տուժածը հոսպիտալացվել է
Իսրայելական Israel Aerospace Industries-ն Ադրբեջանին երկու արբանյակ կմատակարարի․ Haaretz
Քաղաքականություն
27.04.2023 | 21:27
«Israel Aerospace Industries» ընկերությունն ընտրվել է Ադրբեջանին 120 միլիոն դոլար արժողությամբ երկու արբանյակ մատակարարելու համար, հայտնում է Haaretz-ը։
Իսրայելի արտաքին գործերի նախարար Էլի Քոենը, որն անցյալ շաբաթ այցելել էր Բաքու, Times of Israel-ին տված հարցազրույցում հաստատել է, որ Ադրբեջանն «արբանյակային գնումների գործարքում իսրայելական ընկերություն է ընտրել»:
Բացի այդ, ադրբեջանական լրատվամիջոցներն օրերս հայտնել էին արբանյակների մատակարարման մասին՝ վկայակոչելով իսրայելցի լրագրողին, որն ուղեկցել էր Իսրայելի արտգործնախարար Քոենին Ադրբեջան կատարած այցի ժամանակ։
Ավելի վաղ Ադրբեջանի Թվային զարգացման և տրանսպորտի նախարարությունը հայտնել էր, որ երկրի առաջին դիտման արբանյակի հետ կապը կորել է, և այն ավարտել է առաքելությունը նախատեսված ժամկետից մեկ տարի շուտ՝ շահագործման 9-րդ տարում։ Նշվում էր, որ արբանյակի հետ տեղեկատվության փոխանակումը դադարեցվել է։ Azercosmos-ը և արբանյակն արտադրողը փորձել են վերականգնել կապը, բայց չի հաջողվել։
Իսրայելական լրատվականը նշում է, որ «Israel Aerospace Industries»-ն արբանյակային բիզնեսում է 1980-ական թվականներից։ Այն Ofek-1-ն ուղեծիր է արձակել 1988 թվականին և այդ ժամանակից ի վեր պատասխանատու է Օfek ընտանիքի հետախուզական արբանյակների արձակման կայանների և մշակման համար, որոնք կրում են առաջադեմ հետախուզական սենսորներ: Վերջին՝ Ofek 13-ն արձակվել է մարտին։ Մեկ տարի առաջ էլ արձակել է EROS-C3՝ երբևէ մշակված ամենամեծ հետախուզական արբանյակը ImageSat International ընկերության համար:
Ընկերությունը նաև մշակում է հետազոտական և կապի արբանյակներ, ինչպես նաև արբանյակային վերգետնյա կայաններ։ Անցյալ տարի ընկերությունը ներկայացրել է երկու նոր մոդելներ՝ Mini Communications Satellite-ը և OptSAR-550 միկրոարբանյակը։
Լրատվամիջոցի հարցումներին «Israel Aerospace Industries» ընկերությունից այդպես էլ որևէ մեկնաբանություն չի տրվել։
Էմմա Չոբանյան
