ՌԴ-ում հրդեհվել է մի ամբողջ բնակավայր․ տեղացիները հրդեհն «ապոկալիպսիս» են անվանում

Ռուսաստանի Սվերդլովսկի մարզում արդեն երկրորդ օրն է՝ այրվում է մի ամբողջ բնակավայր՝ Սոսվա ավանը։ Հրդեհն արդեն ավերել է ավելի քան 150 տուն, քրեակատարողական գաղութ, հիվանդանոց, դպրոց, վնասել են էլեկտրահաղորդման գծերն ու երկաթուղային կայարանը։ Նախնական տվյալներով՝ երկու տեղի բնակիչ է զոհվել։

Ականատեսները, ովքեր կարողացել են լքել գյուղը, ասել են, որ Սոսվան չկա, իսկ հրդեհը «ապոկալիպսիս» են անվանել։

ՌԴ Քննչական կոմիտեն արդեն սկսել է զբաղվել Սվերդլովսկի մարզում տեղի ունեցած խոշոր հրդեհի հանգամանքների ուսումնասիրությամբ։ ՌԴ դատախազությունը ևս Սոսվայում ստուգումներ է անցկացնում։

Դաշնության ոստիկանության ներկայացրած վարկածներից մեկի համաձայն՝ հրդեհը բռնկվել է տեղի փայտամշակման ձեռնարկության տարածքում մխացող թեփի պատճառով։

«Ըստ նախնական տեղեկությունների՝ 2023 թվականի ապրիլի 25-ին ժամը 12:58-ին Միասնական հերթապահություն և դիսպետչերական ծառայություն հաղորդագրություն է ստացվել սղոցարանում բռնկված հրդեհի մասին, որից հետո Սոսվայի բնակիչների համար իսկական դժոխք է սկսվել»,- ասված է հաղորդագրության մեջ։

Սոսվայում հրդեհը դեռևս շարունակվում է։ Ռուսական լրատվամիջոցների փոխանցմամբ՝ հրդեհաշիջման աշխատանքները շարունակվում են ուղղաթիռների օգնությամբ։ Մինչ այժմ այն հնարավոր է եղել տեղայնացնել միայն մինչև ինը հազար ք․մ․ տարածքի վրա։

Տեղեկացվում է, որ հրդեհի արագ տարածմանը նպաստում են չոր բուսականության մեծ քանակությունը, վայրկյանում 20 մետր արագությամբ քամին, ինչպես նաև ջրի աղբյուրների հեռավորությունը։

Հրդեհի հետևանքով հարյուրավոր մարդիկ մնացել են անօթևան։

Մանրամասները՝ տեսանյութում:

Տաթև Ֆռանգյան