Ինչպես է ստացվել, որ Տարոն Մարգարյանը պաշտոնական հանդիպում է ունեցել, բայց չի լուսանկարվել

Երևանի քաղաքապետ Տարոն Մարգարյանը հանդիպել է Սանկտ Պետերբուրգի օրերի անցկացման շրջանակում Երևան ժամանած Սանկտ Պետերբուրգի փոխնահանգապետ Աննա Միտյանինայի հետ: Ըստ քաղաքապետարանի տարածած պաշտոնական հաղորդագրության՝ ողջունելով Սանկտ Պետերբուրգի պատվիրակության հերթական այցը` քաղաքապետ Տարոն Մարգարյանը մեկ անգամ ևս վերահաստատել է Երևանի քաղաքապետարանի պատրաստակամությունը՝ էլ ավելի զարգացնելու և ամրապնդելու ՌԴ հյուսիսային մայրաքաղաքի հետ բազմակողմ և բազմոլորտ փոխգործակցությունը:

Շնորհակալություն հայտնելով ջերմ ընդունելության և փոխգործակցության ամրապնդման ու խորացման պատրաստակամության համար` Սանկտ Պետերբուրգի փոխնահանգապետ Աննա Միտյանինան էլ իր հերթին վստահեցրել է, որ այդ պատրաստակամությունը փոխադարձ է:

Ավելի ուշ Երևանի քաղաքապետի տեղակալ Դավիթ Օհանյանն ու Սանկտ Պետերբուրգի փոխնահանգապետ Աննա Միտյանինան ներկա են գտնվել Երևանում անցկացվող Սանկտ Պետերբուրգի օրերի բացման պաշտոնական արարողությանը, որն ուղեկցվել է կլոր սեղան-քննարկումով: Երևանի քաղաքապետ Տարոն Մարգարյանի անունից ողջունելով ռուս հյուրերին` քաղաքապետի տեղակալ Դավիթ Օհանյանը նշել է, որ Երևանի և Սանկտ Պետերբուրգի միջև ձևավորված բարեկամական ու գործընկերային բազմակողմ համագործակցությունը գնալով ընդլայնվում է: 

Կլոր սեղան-քննարկմանը ներկայացվել է Սանկտ Պետերբուրգի մասին պատմող ճանաչողական տեսաֆիլմ, ելույթներով հանդես են եկել Երևանի քաղաքապետարանի և Սանկտ Պետերբուրգի կառավարության միջև համագործակցության ոլորտային պատասխանատուները: Հանդիպմանը ներկա են գտնվել նաև Սանկտ Պետերբուրգում ՀՀ գլխավոր հյուպատոս Հրայր Կարապետյանն ու Երևանի քաղաքապետարանի ներկայացուցչության ղեկավար Արմենակ Կարապետյանը:

Ուշագրավ է, որ Տարոն Մարգարյանի հրաժարականի մասին համառ լուրերի ֆոնին  Երևանի քաղաքապետի հրապարակային  գործունեությունը փաստող որեւէ լուսանկար քաղաքապետարանի լրատվական ծառայության կողմից այդպես էլ չի ներկայացվել։ Հիշեցնենք, որ Տարոն Մարգարյանը  ներկա չէր նաեւ երեկ կայացած Երեւանի ավագանու նիստին։