27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Ալեքսեյ Նավալնիի դեմ «ահաբեկչության» մեղադրանքով նոր գործ է հարուցվել․ նրան 30 տարվա ազատազրկում է սպառնում
Քաղաքականություն
26.04.2023 | 16:43
Ռուս հայտնի ընդդիմադիր գործիչ Ալեքսեյ Նավալնին, որն իր պատիժն է կրում Վլադիմիրի մարզի 2-րդ ուղղիչ գաղութում, հայտնել է, որ իր դեմ նոր քրեական գործ է հարուցվել ահաբեկչության հոդվածով, գրում է DW-ի ռուսական ծառայությունը։
«Քննիչն ինձ ասաց, որ իմ դեմ ահաբեկչության վերաբերյալ նոր գործ է հարուցվել, և ռազմական դատարանը դրա հիման վրա ինձ դատելու է։ Անհեթեթ մեղադրանքներ են առաջադրել, որոնցով ինձ սպառնում է 30 տարվա ազատազրկում, քննիչ Վիդյուկովը երեկ ասել է, որ այս գործից առանձնացվել է ահաբեկչության մեղադրանքով գործը, որ ես, բանտում նստած, ահաբեկչություններ եմ անում։ Իսկ այս դեպքում ինձ առանձին կդատի զինվորական դատարանը»,- ասել է Նավալնին՝ տեսակապով խոսելով Մոսկվայի Բասմանի դատարանում։
«Այս գործով ինձ սպառնում է 30 տարի ժամկետով, ըստ երևույթին, հաջորդով՝ ցմահ ազատազրկում»,- Նավալնիի խոսքերն են մեջբերում նրա գործընկերները։
Հաղորդվում է, որ նոր գործն անջատված է 2022 թվականի հոկտեմբերին Նավալնիի դեմ հարուցված «ծայրահեղականության» գործից։ Ապրիլի 26-ին Մոսկվայի Բասմանի դատարանը քննել է հետաքննության միջնորդությունը՝ սահմանափակելու այն ժամանակը, որի ընթացքում Նավալնին կարող էր ծանոթանալ այս գործի նյութերին։
Քննչական կոմիտեի ներկայացուցչի պահանջով հանդիպումն անցել է դռնփակ։ Արդյունքում Նավալնիին ընդամենը 10 օր ժամանակ է տրվել «ծայրահեղականության» գործին ծանոթանալու համար, որը կազմված է 196 հատորից։
Նախօրեին Ալեքսեյ Նավալնին նաև հայտնել էր, որ իրեն թույլ չեն տալիս ուտել գաղութի ճաշարանից իր գնած ուտելիքը։
