Լաշա Տալախաձեին կարող էր հաղթել միայն Սիմոն Մարտիրոսյանը․ հավաքականի մարզիչ․ ՏԵՍԱՆՅՈՒԹ

Ծանրամարտի Հայաստանի հավաքականի գլխավոր մարզիչ Փաշիկ Ալավերդյանը այսօր հրավիրված մամուլի ասուլիսում ամփոփում է Երևանում կայացած առաջնությունը։

Հիշեցնենք՝ Երևանում ավարտված ծանրամարտի Եվրոպայի առաջնությունում գերծանր քաշային հայ ծանրորդ Վարազդատ Լալայանը երկամարտի 462 կգ արդյունքով (212+250 կգ) կարիերայում երկրորդ անգամ օրերս դարձել էր ԵԱ-ի արծաթե մեդալակիր, իսկ Սիմոն Մարտիրոսյանը ԵԱ-ում նվաճել էր բրոնզե մեդալ՝ երկամարտի 440 կգ արդյունքով (195 + 245 կգ):

Պոկում և հրում վարժություններում ևս հայ գերծանր քաշային ծանրորդներն արժանացել էին փոքր արծաթե և փոքր բրոնզե մեդալներին համապատասխանաբար: Այս քաշային կարգում Եվրոպայի չեմպիոնի տիտղոսը կարիերայում 7-րդ անգամ նվաճել էր Վրաստանի ներկայացուցիչ Լաշա Տալախաձեն՝ արժանանալով նաև առանձին վարժությունների ոսկե մեդալներին: Տալախաձեն Եվրոպայում առաջինն է ճանաչվել երկամարտի 474 կգ արդյունքով:

«Լաշային այսքան ժամանակ կարող էր հաղթել միայն Սիմոնը։ Սիմոնը այն մարզիկներից է, որ կարող է բարձրացնել ցանկացած կիլոգրամ, եթե լինի կարգապահ, աշխատասեր ու վնասվածքները նրան չխանգարեն։ Սիմոնը չկարողացավ հաղթել,  նրա վնասվածքները, քաշային կարգը փոխելը շատ խանգարեցին նրան։ Լաշան, այո, առայժմն մնում է որպես անպարտելի ծանրորդ։ Լաշան հրաշալի մարդ է, հրաշալի տղա, մեր տղաների հետ շատ մոտ է, ունեն միմյանց հետ ընկերական հարաբերություններ։ Շատ ժամանակ նրան կատակով ասում էի՝ քո կեսը հայ է»,- նշեց Փաշիկ Ալավերդյանը՝ անդրադառնալով հարցին, թե ի վերջո հայ ծանրորդներին երբ է հաջողվելու հաղթող դուրս գալ վրացի հայտնի ծանրորդի հետ պայքարում։

Մանրամասները՝ տեսանյութում։