16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Ղարիբաշվիլին ակնկալում է, որ մինչև տարեվերջ Վրաստանը կդառնա ԵՄ անդամի թեկնածու
Քաղաքականություն
26.04.2023 | 17:36
Վրաստանի վարչապետ Իրակլի Ղարիբաշվիլին Եվրախորհրդի նախագահ Շառլ Միշելի հետ հանդիպման ժամանակ ասել է, որ Թբիլիսին կատարել է առաջարկությունների մեծ մասը և արժանի է մինչև 2023 թվականի ավարտը ստանալ ԵՄ անդամության թեկնածուի կարգավիճակ։ Այս մասին հայտնել է Վրաստանի կառավարության մամուլի ծառայությունը, փոխանցում է Ինտերֆաքսը։
Աշխատանքային այցով Բրյուսելում գտնվող Ղարիբաշվիլին Միշելի հետ հանդիպմանը ներկայացրել է Վրաստանի ջանքերը Եվրահանձնաժողովի 12 առաջնահերթությունների իրականացման ուղղությամբ։
Նա նշել է, որ այս գործընթացում կառավարությունը մշտական խորհրդակցությունների մեջ է ԵՄ կառույցների և անդամ երկրների, ինչպես նաև Վենետիկի հանձնաժողովի ու ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) հետ։
Կողմերը քննարկել են նաև Ուկրաինայում տիրող իրավիճակը և դրա ազդեցությունը տարածաշրջանի անվտանգության վրա։
Ղարիբաշվիլին հանդիպել է նաև ՆԱՏՕ-ի գլխավոր քարտուղար Յենս Ստոլտենբերգի հետ և հայտարարել, որ Վրաստանը պատրաստ է է՛լ ավելի խորացնել քաղաքական երկխոսությունը և գործնական համագործակցությունը ՆԱՏՕ-ի հետ բոլոր հարթություններում։
Տաթև Ֆռանգյան
