17.12.2025 | 21:22
Արագածոտնի թեմը վաղվա պատարագը տեղափոխում է Մայր Աթոռ. այն կկայանա նույն ժամին, ինչ 10 եպիսկոպոսների հայտարարած հավաքն է
Ոստիկանները բռնություն կիրառելիս ոնց որ հաճույք, բավականություն ստանան․ Արա Ղարագյոզյան․ ՏԵՍԱՆՅՈՒԹ
Հասարակություն
26.04.2023 | 14:27
«Հասարակությունը կարծեք թե արդարացնում է ոստիկանության կողմից բռնություն կիրառելը։ Հասարակությունն անընդհատ տեսնում է բռնություն, և հասարակական ընկալմամբ՝ եթե ԱԺ-ում բռնություն է կիրառվում, իրար վրա շշեր են նետում, մարդկանց վրա են թքում, ինչո՞ւ ոստիկանությունը բռնություն չպետք է կիրառի»,- «Բռնության հերթական դեպքերը ոստիկանների կողմից» թեմայով քննարկման ժամանակ այս մասին նշեց «Հելսինկյան ասոցիացիա» իրավապաշտպան ՀԿ-ի փաստաբան Արա Ղարագյոզյանը՝ անդրադառնալով երևանան «Պոլիգրաֆ» ակումում ապրիլի 23-ին Ոստիկանության իրականացրած գործողություններին։
Իրավապաշտպանի դիտարկմամբ՝ անհասկանալի է ոստիկանների կողմից բռնություն կիրառելու նպատակը։
«Ակումբում ոչ ոք չի խոչընդոտել ոստիկանության օրինական գործողությունները, տեսանյութում երևում է, որ ոստիկանը հետ է գալիս, խփում է քաղաքացուն, հետո նոր դուրս է գալիս։ Ոստիկանները բռնություն կիրառելիս ոնց որ հաճույք են ստանում, բավարարվածություն են զգում։ Դիմադրություն չկար, ակումբում այդ թատերական ներկայացումը սարքելու և 41 անձի բերման ենթարկելու իմաստը ո՞րն էր։ Պետք է քննության առարկա դառնա այդ անձանց ապօրինի բերման ենթարկելու հանգամանքը։ Չեմ կարծում, թե այնտեղ բոլորը թմրանյութ են օգտագործել»,- նշեց Ղարագյոզյանը։
Իրավապաշտպանի խոսքով՝ բերման ենթարկվածները իրենց հայտարարություններում նշել են, որ ենթարկվել են նվաստացնող վերաբերմունքի, ինչն անթույլատրելի է։
Նշենք, որ Քննչական կոմիտեն հաղորդագրություն է տարածել, որի համաձայն՝ Քննչական կոմիտեի ԵՔՔՎ Կենտրոն և Նորք Մարաշ վարչական շրջանների քննչական երկրորդ բաժնում իրականացվող քննությամբ պարզվում են Երևան քաղաքում գործող «Պոլիգրաֆ» ակումբում իրացման նպատակով առերևույթ ապօրինի թմրամիջոցների շրջանառության դեպքի հանգամանքները։ Ձեռնարկված օպերատիվ-հետախուզական միջոցառումների արդյունքում պարզվել է, որ նշված ակումբում ապօրինի իրացվել են «Մեթամֆետամին», «Էքստազի», «LSD» և այլ տարբեր տեսակի թմրամիջոցներ։ Դեպքի առթիվ նախաձեռնվել է քրեական վարույթ և սկսվել է նախաքննություն: Ընդհանուր առմամբ ձերբակալվել և ոստիկանության Կենտրոնական բաժին է տեղափոխվել 41 անձ։ Վերջիններս, որպես ձերբակալված, հարցաքննվել են, ապա ազատ արձակվել։ Քրեական վարույթի նախաքննությունը շարունակվում է։
Մանրամասները՝ տեսանյութում։
