Տնտեսություն
26.04.2023 | 12:34Կառավարությունն առաջարկում է հանել գործունեության որոշ տեսակների մասով ծանուցման պահանջը: Արդյունքում դրանցով զբաղվող տնտեսվարողներն այլևս պարտավորված չեն լինի ներկայացնել համապատասխան ծանուցում և վճարել պետական տուրք։ Այս մասին նշեց ՀՀ էկոնոմիկայի նախարարի տեղակալ Անի Իսպիրյանը ԱԺ տնտեսական հարցերի մշտական հանձնաժողովի` ապրիլի 26-ի նիստում «Գործունեության իրականացման ծանուցման մասին« ՀՀ օրենքում փոփոխություններ և լրացում կատարելու մասին» և «Պետական տուրքի մասին» ՀՀ օրենքում փոփոխություններ և լրացումներ կատարելու մասին» նախագծերի փաթեթի երկրորդ ընթերցմամբ քննարկման ժամանակ։
Փոխնախարարը տեղեկացրեց, որ խոսքը վերաբերում է 6 ոլորտի՝ մասնավորապես անասնաբուժության բնագավառում օգտագործվող կիսապատրաստուքների, բույսերի պաշտպանության քիմիական և կենսաբանական միջոցների արտադրությանը կամ վաճառքին, ինչպես նաև անասնաբուժասանիտարական փորձաքննությանը:
Ըստ Անի Իսպիրյանի` վերջին տարիներին վերոնշյալ ոլորտներում գործունեություն ծավալելու համար ընդհանրապես դիմողներ չեն եղել:
Պարտադիր ծանուցման ցանկից կհանվեն նաև 100 հազար լիտրից ավելի շշալցված կոնյակի իրացման և ներմուծման գործունեությամբ զբաղվելու համար ծանուցման պահանջը և համապատասխան պետական տուրքի վճարման անհրաժեշտությունը:
Վիսկիների, ռոմի, ջինի, սպիրտային այլ թուրմերի և մինչև 22 տոկոս սպիրտ պարունակող այլ խմիչքների արտադրության գործունեության տեսակները կմիավորվեն և դրանցով զբաղվելու իրավունք ձեռք բերելու համար կսահմանվի 3.0 մլն. դրամ տարեկան պետական տուրք:
Իսպիրյանի խոսքով՝ առաջին ընթերցումից հետո Կառավարությունը ներկայացրել է խմբագրական, ինչպես նաև որոշ օրենքների` ավելի ուշ ուժի մեջ մտնելու վերաբերյալ առաջարկներ, որոնք ընդունվել են:
Հանձնաժողովականները կողմ արտահայտվեցին օրենսդրական այս նախաձեռնությանն ու տվեցին դրական եզրակացություն:
Մանրամասները՝ տեսանյութում։
