24.02.2026 | 14:15
Հայտնի է դարձել՝ ինչ է Մեսին ասել մրցավարին․ ՏԵՍԱՆՅՈՒԹ
Չավուշօղլուից հետո Ջո Բայդենի ապրիլքսանչորսյան ուղերձին արձագանքել է Թուրքիայի խորհրդարանի նախագահը
Քաղաքականություն
25.04.2023 | 19:13
Թուրքիայի խորհրդարանի նախագահ Մուսթաֆա Շենթոփը հարցազրույց է տվել տեղական TRT Haber-ին և, այլ հարցերից զատ, անդրադարձել է նաև Հայոց ցեղասպանության 108-րդ տարելիցի կապակցությամբ ԱՄՆ նախագահ Ջո Բայդենի ուղերձին։
Շենթոփը հայտարարել է, որ Բայդենի ուղերձն անակնկալ չի եղել Թուրքիայի համար։
«Սպասում էի, որ Բայդենը նման հայտարարություն կանի նաև այս տարի։ ԱՄՆ-ում հայկական լոբբի կա, դա անում են իրենց հաճոյանալու համար։ Հայաստանին ձեռնտու չէ պահպանել իր առկա տնտեսական և քաղաքական հարաբերությունները տարածաշրջանում, որտեղ գտնվում է։ Մի քանի հազարանոց հայկական սփյուռքին հաճոյանալու համար արված հայտարարությունները ճիշտ չեն։ Այս հայտարարությունն իրավական հիմք չունի։ Որպես Թուրքիա՝ գլուխ խոնարհելու ոչինչ չունենք։ Մեր պատմության մեջ չկա որևէ իրադարձություն, որի համար մենք պետք է ամաչենք»,- հայտարարել է Շենթոփը։
Հիշեցնենք, որ նախօրեին էլ Թուրքիայի ԱԳ նախարար Մևլութ Չավուշօղլուն, արձագանքելով Ջո Բայդենի ուղերձին, այն «քաղաքական շառլատանություն» էր անվանել։
«Պատմությունը խեղաթյուրելու ևս մեկ փորձ քաղաքական շառլատանների կողմից: Քաղաքական հայտարարությունները չեն կարող փոխել փաստերը։ Նրանք, որոնք օգուտ են ուզում ստանալ, հիշվելու են որպես երկերեսանիներ։ Ոչ ոք չի կարող թուրք մեծ ժողովրդին պատմության դասեր տալ»,- գրել էր Չավուշօղլուն թվիթերյան իր էջում։
Հիշեցնենք, որ ԱՄՆ նախագահ Ջո Բայդենն Ապրիլի 24-ի կապակցությամբ հղած ուղերձում կրկին օգտագործել է «ցեղասպանություն» եզրույթը։
Էմմա Չոբանյան
