Հազարավոր օտարերկրացիներ տարհանվել են Սուդանից. ՄԱԿ-ը տարածաշրջանում այլ հակամարտությունների մտավախություն ունի

Հրադադարի պայմաններում Սուդանի մայրաքաղաք Խարթումից տարհանված Իտալիայի քաղաքացիների առաջին խումբը ժամանել է Հռոմ։ Սուդանից հեռացած օտարերկրացիների թիվն արդեն հազարների է հասնում, հաղորդում է Euronews-ը։

Կառավարական բանակի և «Արագ արձագանքման ուժեր» ռազմական խմբավորման միջև շարունակվող դիմակայությունն արդեն հանգեցրել է ավելի քան 420 զոհի և 3700 վիրավորի։

Երեքշաբթի վաղ առավոտյան հակամարտության երկու կողմերը սոցիալական ցանցերի միջոցով հաստատել են, որ Միացյալ Նահանգների առաջարկած 72-ժամյա զինադադարն ուժի մեջ է։

Եվրոպական դիվանագիտության ղեկավար Ժոզեպ Բորելի խոսքով՝ ԵՄ երկրներին արդեն հաջողվել է դուրս բերել Սուդանում գտնվող քաղաքացիների երկու երրորդին, այսինքն՝ 1500-ից 1000-ին, որոնք գտնվում էին երկրում հակամարտության բռնկման պահին։

Ֆրանսիան նաև տարհանման օպերացիա է անցկացնում և բազա է ստեղծում Ջիբութիում՝ բոլոր տեղահանվածներին ընդունելու համար։

Շատ սուդանցիների համար օտարերկրացիների ինքնաբուխ տարհանումը սարսափեցնող նշան է, որ միջազգային տերությունները, հրադադարի հաստատման կրկնակի ձախողումներից հետո, կանխատեսում են միայն ավելի վատ մարտեր, որոնք բնակչությանն արդեն հասցրել են աղետի:

ՄԱԿ-ի գլխավոր քարտուղարն արդեն խոստացել է՝ ՄԱԿ-ը մենակ չի թողնի Սուդանին։ Անտոնիո Գուտերեշը նախազգուշացրել է «աղետալի հրդեհի» մասին, որը կարող է ընդգրկել ամբողջ տարածաշրջանը։

Նա ՄԱԿ-ի Անվտանգության խորհրդի 15 անդամներին կոչ է արել «առավելագույն ազդեցություն գործադրել» երկու կողմերի վրա՝ «Սուդանը եզրից հետ բերելու համար»։

Տաթև Ֆռանգյան