13.01.2025 | 23:21
Հասմիկ Տոլմաջյանը նշանակվել է Շվեյցարիայում ՀՀ դեսպան
Մեդվեդևը հայտարարել է, որ ՌԴ-ն կարող է առաջինը միջուկային զենք կիրառել
Քաղաքականություն
25.04.2023 | 17:29
ՌԴ Անվտանգության խորհրդի փոխնախագահ Դմիտրի Մեդվեդևը հերթական անգամ սպառնացել է միջուկային զենք կիրառել՝ հայտարարելով, որ Ռուսաստանը կարող է առաջինը դա անել, «եթե իր դեմ դրսևորվի ագրեսիա, որը սպառնում է պետության գոյությանը», գրում է DW-ի ռուսական ծառայությունը։
«Դուք ասացիք, որ Ռուսաստանը երբեք առաջինը չի օգտագործի միջուկային զենք, բայց դա լիովին ճիշտ չէ»,- ասել է նա «Գիտելիք. առաջինները» կրթական մարաթոնի ընթացքում ունեցած ելույթում:
Մեդվեդևն անդրադարձել է ՌԴ-ի միջուկային դոկտրինի կետերից մեկին։
«Այն ուղղակիորեն ասում է, որ միջուկային զենքը կարող է օգտագործվել այն դեպքում, երբ Ռուսաստանի Դաշնության դեմ ագրեսիա իրականացվի այլ տեսակի զենքերի կիրառմամբ, որոնք սպառնում են պետության գոյությանը։ Սա, ըստ էության, միջուկային զենքի կիրառումն է՝ ի պատասխան նման գործողությունների։ Եվ մեր պոտենցիալ հակառակորդները դա չպետք է թերագնահատեն»,- ընդգծել է ՌԴ Անվտանգության խորհրդի փոխնախագահը։
Նույն պատճառով, նրա կարծիքով, այլ պետություններ նույնպես ձգտում են միջուկային զենք ունենալ:
Դմիտրի Մեդվեդևը Ուկրաինայի դեմ Ռուսաստանի պատերազմի ընթացքում բազմիցս սպառնացել է միջուկային զենք կիրառել «Ռուսաստանի գոյությանը սպառնացող վտանգի դեպքում»։ Այս հայտարարությունները կտրուկ բացասական արձագանք են առաջացրել Ուկրաինային աջակցող Արևմուտքում։
Միևնույն ժամանակ, ՆԱՏՕ-ի և ԵՄ-ի երկրները բազմիցս միաձայն ընդգծել են, որ թույլ չեն տա Ռուսաստանին հաղթել անարդար ագրեսիվ պատերազմում հարևան պետության դեմ։
Տաթև Ֆռանգյան
