ԱՄՆ-ը հայտարարել է Սուդանում եռօրյա հրադադարի համաձայնության հասնելու մասին

ԱՄՆ պետքարտուղար Էնթոնի Բլինքենը հայտարարել է, որ Սուդանում պատերազմող կողմերը համաձայնել են եռօրյա զինադադարի մասին, որը պետք է սկսվի տեղական ժամանակով կեսգիշերին, գրում է BBC-ի ռուսական ծառայությունը։

Սա արդեն երրորդ զինադադարի հայտարարությունն է ինը օր շարունակվող մարտերի ընթացքում, սակայն նախորդ երկուսը խախտվել են։

Ըստ BBC Washington-ի թղթակից Բարբարա Աշեր-Պլետի՝ Էնթոնի Բլինքենը չի բացատրել, թե ինչու է կարծում, որ այս անգամ մարտերն իսկապես կդադարեն։ Բլինքենը միայն նշել է, որ 48 ժամ տևած բանակցությունների արդյունքում հրադադարի մասին համաձայնություն է ձեռք բերվել ռազմականացված «Արագ աջակցության ուժերի» պարագլխի և կանոնավոր բանակի միջև։

Reuters-ն իր հերթին հայտնում է, որ բանակցություններում որպես միջնորդ հանդես են եկել ԱՄՆ-ը և Սաուդյան Արաբիան։

«Արագ աջակցության ուժերը» հաստատել են Բլինքենի խոսքերը՝ հայտարարություն տարածելով, որ պատրաստ են ամբողջական զինադադարի։

Սուդանի բանակը հրադադարի մեկնարկի մասին Բլինքենի հայտարարությունից երկու ժամ անց Facebook սոցցանցի միջոցով նույնպես հայտարարել է, որ մտադիր է հետևել հրադադարին։

Հիշեցնենք, որ Սուդանում բախումները սկսվել են ապրիլի 15-ին։ Այս ընթացքում առնվազն 400 մարդ է զոհվել: Մարտերի պատճառով Սուդանի մայրաքաղաք Խարթումի բնակիչները ստիպված են եղել մնալ իրենց տներում, նրանց սննդամթերքն ու ջուրը սպառվել է։ Որոշ վայրերում վնասվել են ջրատարները և շատ խարթումցիներ ստիպված են եղել ջուր բերել Նեղոս գետից։

Եթե հրադադարը պահպանվի, դա խաղաղ բնակիչներին հնարավորություն կտա լքել քաղաքը։ Բացի այդ, օտարերկրյա պետոթյունները հուսով են, որ կկարողանան Սուդանից տարհանել իրենց քաղաքացիներին։

Տաթև Ֆռանգյան