12.12.2024 | 18:49
Կրեմլի պնդմամբ՝ Կիևը հրաժարվել է «սուրբծննդյան զինադադարից»
Ֆրանսիայում կաթսաներով ու թավաներով բողոքի ակցիա է անցկացվել
Քաղաքականություն
25.04.2023 | 17:12
Ֆրանսիայում ապրիլի 24-ին՝ նախագահ Էմանուել Մակրոնի՝ երկրորդ ժամկետով վերընտրվելու տարեդարձին կաթսաներով ու թավաներով ցույցեր են անցկացվել։ Հազարավոր մարդիկ ամբողջ երկրում մասնակցել են կենսաթոշակային բարեփոխումների դեմ բողոքի ցույցերին։ Ցուցարարները խափանել են կառավարության մի քանի անդամների աշխատանքային այցերը, հայտնում է Le Figaro-ն։
Մասնավորապես, կրթության նախարար Պապ Նդիայը փոխել է իր այցը Լիոնի հաստատություններից մեկը՝ շենքի առջև ցուցարարների հավաքի պատճառով։ Փարիզ վերադառնալուն պես պաշտոնյային ժամանակավորապես արգելափակել են գնացքում՝ մի քանի տասնյակ ցուցարարներ «կաթսաների և թավաների համերգ» են կազմակերպել հարթակում։
Երեխաների հարցերով պետքարտուղար Շառլոտ Քոբելը չեղյալ է հայտարարել ծրագրված այցը Սեն Մորիս քաղաքի հիվանդանոց՝ բողոքի ցույցերի պատճառով։ Մշակույթի նախարար Ռիմա Աբդուլ-Մալաքին փարիզյան թատրոններից մեկի դիմաց դիմավորել են կաթսաներով։ Նույն կերպ ցուցարարները դիմավորել են նաև արդարադատության նախարար Էրիկ Դյուպոն-Մորետտիին և առողջապահության նախարար Ֆրանսուա Բրաունին։
Ֆրանսիայում կենսաթոշակային բարեփոխումների դեմ բողոքի ցույցերը, որոնք ներառում են կենսաթոշակային տարիքը 62-ից 64-ի բարձրացնելու դրույթ, շարունակվում են հունվարի կեսերից, երբ նախագիծը պաշտոնապես ներկայացվեց հանրությանը:
Ամենամեծ բողոքի ցույցերին մասնակցել են հարյուր հազարավոր մարդիկ, գործադուլների պատճառով չեղարկվել են չվերթներ, դադարեցվել է միջքաղաքային գնացքների երթևեկությունը, աղբահանության հետ կապված լուրջ խնդիրներ են առաջացել։ Չնայած դրան՝ Էմանուել Մակրոնն ապրիլի 15-ին ստորագրել է վիճահարույց օրենքը։
Տաթև Ֆռանգյան
