Ցեղասպանության զոհերի ժառանգների ուժն ու դիմադրությունը մեզ հիշեցնում են մեր հավաքական պատասխանատվության մասին․ Կանադայի վարչապետի ուղերձը

Կանադայի վարչապետ Ջասթին Թրյուդոն Հայոց ցեղասպանության զոհերի հիշատակի օրվան նվիրված հայտարարությամբ է հանդես եկել։

«Այսօր մենք միանում ենք Կանադայի և ամբողջ աշխարհի հայ համայնքներին՝ Հայոց ցեղասպանության հիշատակի օրը: Մենք անդրադառնում ենք 1915-1923 թվականներին հայ ժողովրդի դեմ իրականացված վայրագություններին և հիշում նրանց, որոնք կորցրել են իրենց կյանքը և բոլոր նրանց, ովքեր կրել են անասելի տառապանքներ: Մենք համերաշխ ենք նաև զոհերի ժառանգների և բոլոր նրանց հետ, որոնք շարունակում են ապրել այս աներևակայելի ողբերգության միջսերնդային տրավմայի հետ։ Նրանց ուժն ու դիմադրությունը մեզ հիշեցնում են մեր հավաքական պատասխանատվության մասին՝ դիմակայելու ատելությանն իր բոլոր ձևերով, երբ և որտեղ այն տեղի ունենա: Յուրաքանչյուր ոք արժանի է ապրել խարանից, հալածանքներից և խտրականությունից զերծ կյանքով»,- ասվում է ուղերձում։

Նշվում է նաև, որ ապրիլը Կանադայում Ցեղասպանության հիշատակի, դատապարտման և կանխարգելման ամիս է։

«Սա ժամանակ է կանադացիների համար՝ հիշելու ցեղասպանության բոլոր զոհերին ամբողջ աշխարհում, դատապարտելու ատելությունը, որը հանգեցնում է այդ ողբերգություններին և մտածելու, թե ինչպես կարող ենք կանխել դրանց կրկնությունը: Կանադան միշտ կկանգնի անարդարության, անհանդուրժողականության և այլատյացության դեմ, մենք կշարունակենք խթանել խաղաղությունն ու արդարությունը բոլորի համար: Քանի որ Հայոց ցեղասպանության զոհերի հիշատակի օրն է, ես բոլոր կանադացիներին հրավիրում եմ ծանոթանալ մարդկության պատմության այս մութ գլխին, հարգանքի տուրք մատուցել զոհերին և համերաշխ լինել հայ համայնքի, այդ թվում՝ հայկական ժառանգություն ունեցող կանադացիների հետ, որոնք շարունակում են օգնել Կանադան դարձնել Կանադա՝ ուժեղ և ներառական երկիր, որը մենք գիտենք: Սովորելու և երկխոսության միջոցով մենք կարող ենք համոզված լինել, որ նման վայրագություններն այլևս տեղի չեն ունենա, և մենք կարող ենք կառուցել ազատ աշխարհ՝ առանց նախապաշարմունքների»,- ասվում է Կանադայի վարչապետի ուղերձում։

Էմմա Չոբանյան