25.07.2026 | 19:46
Համբուրգ․ Էլինա Ավանեսյանը պարտվեց կիսաեզրափակիչում. ՏԵՍԱՆՅՈՒԹ
Ուկրաինացի զինվորականներն ամրացրել են դիրքերը Դնեպրի արևելյան ափին․ վերլուծաբաններն ուկրաինական առաջիկա հակահարձակման նշաններ են տեսնում
Քաղաքականություն
24.04.2023 | 15:28
Վաշինգտոնում գործող Պատերազմի ուսումնասիրության ինստիտուտը (ISW) հայտնել է, որ ուկրաինական ուժերը հաջողությամբ ամրացրել են դիրքերը Դնեպրի արևելյան կողմում: Այս հայտարարությունից հետո ենթադրություններ են հնչել, որ այս փաստը կարող է դիտվել որպես ուկրաինական առաջիկա հակահարձակման մեկնարկի նշան, գրում է VOA-ն։
Վերլուծաբանները կարծում են, որ եթե Ուկրաինան հակահարձակում սկսի, ապա հիմնական նպատակը կլինի ճեղքել Ռուսաստանի և Ղրիմի թերակղզու միջև ցամաքային միջանցքը։
Ի պատասխան ուկրաինական լրատվամիջոցների այն տեղեկությունների, որ վերոնշյալ դիրքերի ձևավորումը վկայում է հակահարձակման մեկնարկի մասին, Ուկրաինայի «Հարավ» օպերատիվ հրամանատարության խոսնակ Նատալյա Գումենյուկը բացատրել է, որ Դնեպրի դելտայում ռազմական գործողությունների մանրամասները չեն կարող բացահայտվել՝ օպերատիվ անվտանգության նկատառումներից ելնելով։
Կանխատեսվում է, որ Ռուսաստանը նույնպես գարնանն ավելի ինտենսիվ հարձակումներ կսկսի, սակայն ISW-ն նշում է, որ ռուսական բարձրագույն ռազմական ղեկավարները, հավանաբար, ավելի շատ շահագրգռված են Ուկրաինայում արդեն իսկ ձեռք բերված նվաճումների ամրապնդմամբ, քան նոր գործողություններով, քանի որ Մոսկվան նյութական և մարդկային ռեսուրսի պակաս է զգում:
Տաթև Ֆռանգյան
