Ուկրաինան հայտնում է, որ Ռուսաստանը իրանական «Շահեդ» ԱԹՍ-ների նոր խմբաքանակ է ստացել

Կամիկաձե անօդաչու թռչող սարքերը, որոնք նախօրեին հարձակվել էին Օդեսայի վրա, ռուսական բանակի ստացած նոր խմբաքանակից են։ Այս մասին հայտարարել է Ուկրաինայի զինված ուժերի «Հարավ» միացյալ հրամանատարության խոսնակ Նատալյա Գումենյուկը, գրում է BBC-ի ռուսական ծառայությունը։ Գումենյուկի խոսքով՝ ավելի վաղ ռուս զինվորականները որոշակի դադար էին պահպանում ու չէին օգտագործում անօդաչուները Ուկրաինայի վրա հարձակման համար՝ սպասելով նոր խմբաքանակի մատակարարմանը։

Անօդաչու սարքերի վրա Ուկրաինայի իշխանությունները հայտնաբերել են նոր գծանշումներ․ ըստ խոսնակի՝ այժմ, երբ ստացվել է նոր խմբաքանակ, անօդաչու սարքերով հարձակումներն ավելի հաճախակի են դառնալու։ Նա նշել է, որ ռուսական բանակի հիմնական նպատակը ոչ միայն մարդկանց հոգեբանական վիճակի վրա ազդելն է, այլ նաև հակաօդային պաշտպանության համակարգերի և կարևոր ենթակառուցվածքների որոնումը։ Այս ամենն անհրաժեշտ է հրթիռների կիրառումը նվազագույնի հասցնելու համար, որոնց պակասն ունի Ռուսաստանը։

Գումենյուկն ասել է, որ Մոսկվան դեռ կարող է հրթիռներով հարձակվել Ուկրաինայի վրա «երբ տեղեկացված լինի կոնկրետ կոորդինատների մասին,որոնք անհրաժեշտ են ճշգրիտ զենքով հարվածի համար»։

Օդեսայի վրա հարձակումից մեկ օր առաջ ուկրաինացի զինվորականները հայտարարել էին, որ Զապորոժիեի ու Դնեպրի շրջանում 7 անօդաչու են խոցել, որոնցից 6-ը՝ «Շահեդ»։

Անցյալ տարվա սկզբին ռուսական բանակը իրանական «Շահեդ» կամիկաձե անօդաչու թռչող սարքերի օգնությամբ սկսեց գրոհել ուկրաինական կարևոր ենթակառուցվածքային օբյեկտները:  Մոսկվան ու Թեհրանը սկզբում հերքում էին, որ Ռուսաստանը Իրանից անօդաչուներ է ստացել։ Ավելի ուշ Իրանի իշխանությունները հայտարարություն էին տարածել՝ պնդումով, , որ ԱԹՍ-ների խմբաքանակ Ռուսաստանին ուղարկել են Ուկրաինա ռուսական ներխուժումից առաջ։

Էմմա Չոբանյան