08.10.2026 | 15:55
Եթե միտում լիներ դահլիճ մտնելու, կմտնեին. Տիգրան Աբրահամյանը` օգնականների գործողությունների մասին․ ՏԵՍԱՆՅՈՒԹ
Ադրբեջանն ու Իսրայելը մի շարք ոլորտներում համագործակցության համաձայնագրեր են կնքել
Քաղաքականություն
19.04.2023 | 19:23
Բաքվում այսօր տեղ է ունեցել Ադրբեջան-Իսրայել միջպետական հանձնաժողովի նիստը, որի արդյունքներով մի շարք փաստաթղթեր են ստորագրվել, գրում են տեղական լրատվամիջոցները։ Նշվում է, որ նիստին քննարկվել են ներդրումներին, նորարարություններին, էկոլոգիային, տեղեկատվությանը, ջրամատակարարմանը, էներգետիկային, գյուղատնտեսությանը, սննդի արդյունաբերությանը, դեղագործությանը, պարենային անվտանգությանը, կիբերանվտանգությանը, զբոսաշրջությանը վերաբերող ու համագործակցության այլ հարցեր։
Ադրբեջանի էկոնոմիկայի նախարար Միքայիլ Ջաբբարովը, ելույթ ունենալով հանդիպմանը, ընդգծել է «ադրբեջանա-իսրայելական հարաբերությունների դինամիկ զարգացումը»։ Նա նշել է, որ երկու երկրների միջև ապրանքաշրջանառության մեջ աճում է ոչ նավթային ապրանքների տեսակարար կշիռը։
Հանդիպման արդյունքում ստորագրվել են մի շարք երկկողմ փաստաթղթեր՝ Ադրբեջանի Ինովացիոն և թվային զարգացման գործակալության և Իսրայելի տեխնոլոգիական նորարարությունների ազգային ինստիտուտի միջև համատեղ հռչակագիրը, SOCAR-ի և իսրայելական Union Energy ընկերության միջև համագործակցության համաձայնագիրը, «Ազերսու»-ի և Իսրայելի ազգային ջրային ընկերության՝ «Մեկորոտ»-ի միջև։ Բացի այդ՝ Ադրբեջանի և Իսրայելի կառավարությունների միջև ստորագրվել է կրթության ոլորտում 2023-2026 թվականների համագործակցության ծրագիր։
Հավելենք, որ այս նիստին մասնակցել է Իսրայելի ԱԳ նախարար Էլի Քոենը,որը մեծ պատվիրակությամբ նախօրեին ժամանել է Բաքու։
Էմմա Չոբանյան
