15.08.2026 | 17:16
Ուկրաինայի ԶՈւ-ն Ռուսաստանի դեմ հարվածների ժամանակ կիրառել է «Ֆլամինգո» հրթիռներ. Զելենսկի
Սուդանում քաղաքացիական պատերազմը շուրջ 270 մարդու կյանք է խլել, կան հազարավոր վիրավորներ․ ԱՀԿ
Քաղաքականություն
19.04.2023 | 11:45
Սուդանում ապրիլի 15-ից շարունակվող երկրի բանակի և Արագ արձագանքման ուժերի (RSF) բախումների հետևանքով զոհվել է 270, վիրավորվել ավելի քան 2,6 հազար մարդ։ Նման տվյալներ է հրապարակել Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը Ժնևում կայացած ճեպազրույցում, փոխանցում է DW-ի ռուսական ծառայությունը։
Նրա խոսքով՝ զոհվածների թվում է ՄԱԿ-ի Պարենի համաշխարհային ծրագրի (ՊՀԾ) երեք աշխատակից։ «Իրավիճակը Սուդանում խորը մտահոգություն է առաջացնում», – այս կապակցությամբ ասել է Գեբրեյեսուսը։ Գեբրեյեսուսի խոսքով՝ օգնությունը, որը իր կազմակերպությունը բաժանել է Սուդանի բժշկական հաստատություններին մինչ ռազմական գործողությունների սկսվելը, արդեն սպառվել է։ Շարունակվող բախումների պատճառով հնարավոր չէ հետագա մատակարարումներ կազմակերպել։ Մայրաքաղաք Խարթումի հիվանդանոցներում վիրավորներին բուժելու համար անհրաժեշտ պարագաներ չկան, հավելել է նա։
«Մտահոգիչ տեղեկություններ կան, որ որոշ բժշկական հաստատություններ թալանվել են, իսկ մյուսներն օգտագործվում են ռազմական նպատակներով»,- ասել է ԱՀԿ գլխավոր տնօրենը։
Ապրիլի 15-ից Սուդանում հակամարտությունը կտրուկ սրվել է Անցումային ինքնիշխան խորհրդի ղեկավար Աբդել Ֆաթահ ալ-Բուրհանի և խորհրդի ղեկավարի տեղակալ Մուհամեդ Համդան Դագալոյի միջև, որը ղեկավարում է Արագ արձագանքման ուժերը։
Խորը տնտեսական ճգնաժամ ապրող Սուդանում 2019 թվականին գահընկեց արվեց տասնամյակներ շարունակ երկիրը ղեկավարած բռնապետ Օմար ալ-Բաշիրը: Կանոնավոր բանակը և RSF-ն այդ ժամանակ համատեղ աջակցեցին ժողովրդական ապստամբություններին։
Ալ-Բաշիրի տապալումից հետո ռազմական և քաղաքացիական խմբերը պայմանավորվեցին ձևավորել անցումային կառավարություն, սակայն 2021 թվականի հոկտեմբերին Սուդանում տեղի ունեցավ հեղաշրջում, որի արդյունքում երկրում իշխանությունն ամբողջությամբ անցավ գեներալ ալ-Բուրհանին։
Տաթև Ֆռանգյան
