22.04.2026 | 23:30
ՀՀ տարածքում ավտոճանապարհները հիմնականում անցանելի են
«Ղարաբաղի հայերը կա՛մ պետք է ընդունեն Ադրբեջանի քաղաքացիություն, կա՛մ բնակության այլ վայր գտնեն»․Ալիևը դարձյալ սպառնալիքներ է հնչեցրել
Քաղաքականություն
18.04.2023 | 19:11
Ադրբեջանի նախագահ Իլհամ Ալիևն այսօր տեղական հեռուստաընկերությունների հետ զրույցում կրկին սպառնացել է Հայաստանին ու Արցախին՝ չթաքցնելով, որ Բաքվի նպատակը ԼՂ-ում էթնիկ զտման քաղաքականությունն է։
«Մենք բազմիցս հայտարարել ենք, որ ոչ մի երկրի հետ չենք քննարկելու մեր ներքին գործերը։ Ղարաբաղը մեր ներքին գործն է»,-ասել է Ալիևը, որը օրերս առաջ Լեռային Ղարաբաղի հակամարտության կարգավորման հարցը քննարկում էր ԵԱՀԿ գործող նախագահ Բույար Օսմանիի հետ։
Ադրբեջանի նախագահը ևս մեկ անգամ կրկնել է ավելի վաղ արված էթնիկ զտման սպառնալիքը, ըստ որի՝ «Արցախի հայերը կա՛մ պետք է ընդունեն Ադրբեջանի քաղաքացիություն, կա՛մ հեռանան և բնակության այլ վայր գտնեն.
«Այստեղ լիակատար ազատություն է, առաջարկվում են բոլոր ժողովրդավարական հիմունքները։ Այս հարցը պետք է լուծվի մարդու իրավունքների հիման վրա»,- ասել է Ալիևը։ Նրա այս պնդումները զավեշտալի են, եթե հաշվի առնենք այն, որ Ադրբեջանը համարվում է աշխարհի ամենաավտորիտար երկրներից մեկը։ Բացի այդ Ալիևը նշել է, թե Հայաստանը այսօր պետք է հայտարարի, որ «Ղարաբաղը Ադրբեջան է»։
«Եթե ասել են Ա-ն, պետք է ասեն նաև Բ-ն։ Հայաստանը, որը Ալմա-Աթայի հռչակագրի հիման վրա խաղաղության պայմանագրի պատրաստակամություն է ցուցաբերել, այժմ պետք է պաշտոնապես հայտարարի, որ Ղարաբաղը՝ Ադրբեջան է»,-ասել է Ադրբեջանի նախագահը։
Էմմա Չոբանյան
