08.10.2026 | 17:43
Առուշանյանը ՔՊ կուսակցության անդամ չէ և չի պատրաստվում դառնալ․ Արմեն Խաչատրյան․ ՏԵՍԱՆՅՈՒԹ
Սուդանում ԵՄ ներկայացուցչի վրա հարձակում է տեղի ունեցել
Քաղաքականություն
18.04.2023 | 12:59
Սուդանում Եվրամիության ներկայացուցիչ, իռլանդացի դիվանագետ Էիդան Օ’Հարան հարձակման է ենթարկվել Խարթումի իր նստավայրում։ Այս մասին Twitter-ում հայտնել է ԵՄ արտաքին քաղաքականության և անվտանգության քաղաքականության գերագույն ներկայացուցիչ Ժոզեպ Բորելը։
A few hours ago, the EU Ambassador in #Sudan was assaulted in his own residency.
This constitues a gross violation of the Vienna Convention. Security of diplomatic premises and staff is a primary responsibility of Sudanese authorities and an obligation under international law.
— Josep Borrell Fontelles (@JosepBorrellF) April 17, 2023
Բորելի խոսքով՝ տեղի ունեցածը Վիեննայի կոնվենցիայի կոպիտ խախտում է։ «Դիվանագիտական տարածքների և անձնակազմի անվտանգության ապահովումը Սուդանի իշխանությունների առաջնահերթ պարտականությունն է և պարտավորությունը՝ համաձայն միջազգային իրավունքի», – ասել է ԵՄ արտաքին գործերի գերագույն ներկայացուցիչը։
Ժոզեպ Բորելը Սուդանում ԵՄ ներկայացուցչի նստավայրի վրա հարձակման հետ կապված այլ մանրամասներ չի հայտնել։ Ինչպես հայտնում է dpa-ն՝ վկայակոչելով դիվանագիտական շրջանակների աղբյուրները, Օ’Հարան չի տուժել և ներկայումս իրեն լավ է զգում։
Ավելի վաղ՝ ապրիլի 17-ին, Բորելը հայտարարել էր, որ Սուդանում շարունակվող բախումների ֆոնին ԵՄ-ն փորձում է հակամարտության երկու կողմերին էլ համոզել մարդասիրական դադարի և երկխոսության անհրաժեշտության մեջ։
Հիշեցնենք, որ մարտերը սկսվել են ապրիլի 15-ի առավոտյան՝ բանակի գլխավոր հրամանատար Աբդել Ֆաթահ Ալ Բուրհանի և նրա տեղակալ, արագ արձագանքման ուժերի հրամանատար Մոհամմեդ Համդան Դագլոյի միջև լարվածության սրումից մի քանի շաբաթ անց։
Տաթև Ֆռանգյան
