27.06.2026 | 11:42
Ուկրաինան հրթիռային հարված է հասցրել «Օրեշնիկ» արտադրող գործարանին
«Թանկ գին եք վճարելու»․ G7-ը՝ Ուկրաինայում Ռուսաստանի պատերազմի աջակիցներին
Քաղաքականություն
18.04.2023 | 12:34
«Մեծ յոթնյակի» երկրները ճապոնական Կարուիզավայում կայացած հանդիպման ժամանակ հստակ դիրքորոշում են հայտնել «Ռուսաստանի և Չինաստանի ագրեսիվ գործողությունների նկատմամբ»։ Այն պետությունները, որոնք աջակցում են ռուսական ներխուժմանը Ուկրաինա, «թանկ գին են վճարելու»․ այս մասին ասվում է G7-ի ԱԳ նախարարների կողմից ընդունված վերջնական հայտարարության մեջ, գրում է DW-ի ռուսական ծառայությունը։
Հանդիպման մասնակիցները խոստացել են «ուժեղացնել համակարգումը երրորդ երկրների կողմից Ռուսաստան զենքի մատակարարումները կանխելու համար»։ ԱԳ նախարարները խիստ դատապարտել են Մոսկվայի սպառնալիքները Բելառուսում մարտավարական միջուկային զենքի կիրառության հնարավորության մասին՝ դրանք անվանելով «անընդունելի»։
«Ռուսաստանի կողմից քիմիական, կենսաբանական կամ միջուկային զենքի ցանկացած կիրառում կունենա սարսափելի հետևանքներ»,- ասվում է փաստաթղթում։
Միաժամանակ, G7-ը պատրաստակամություն է հայտնել էլ ավելի խստացնել պատժամիջոցները Ուկրաինայի պատերազմի համատեքստում։ Հանդիպման մասնակիցները Ռուսաստանին կոչ են արել անհապաղ և անվերապահորեն դուրս բերել Ուկրաինայից բոլոր զորքերը և խոստացել են շարունակել աջակցել Կիևին երկրի վերականգնման գործում: Բացի այդ՝ «Մեծ յոթնյակի» ներկայացուցիչները մեղադրել են Պեկինին Հարավչինական ծովում լարվածություն հրահրելու մեջ։
«Չկա ոչ մի իրավական հիմք Հարավչինական ծովում Չինաստանի լայնածավալ պահանջների համար, և մենք դատապարտում ենք Չինաստանի ռազմատենչ գործունեությունը տարածաշրջանում», – ասվում է փաստաթղթում։
Հայտարարության մեջ նաև ընդգծվում է, որ G7 երկրների հիմնարար դիրքորոշումը Թայվանի նկատմամբ մնում է նույնը։ ԱԳ նախարարները նաև Հյուսիսային Կորեային կոչ են արել զերծ մնալ միջուկային զենքի կամ բալիստիկ հրթիռների հետագա փորձարկումներից:
Էմմա Չոբանյան
