15.01.2025 | 02:30
Միրզոյանն ու Բլինքենը նաև քննարկել են ՀՀ-ԵՄ գործընկերության խորացմանը միտված գործընթացը
Իրանում ուկրաինական Boеing-ի կործանման գործով դատավճիռներ են կայացվել
Քաղաքականություն
17.04.2023 | 15:44
Իրանական դատարանը 10 զինվորականների դատապարտել է տարբեր ժամկետներով ազատազրկման՝ կապված 2020 թվականի հունվարին ուկրաինական Boeing 737-800 մարդատար ինքնաթիռի կործանման գործով, գրում է DW-ի ռուսական ծառայությունը։
Գործով գլխավոր մեղադրյալը՝ Tor-M1 զենիթահրթիռային համակարգի օպերատոր դատապարտվել է 13 տարվա ազատազրկման, ինչպես նաև պարտավոր է փոխհատուցում վճարել զոհվածների ընտանիքներին։
Ըստ մեղադրական եզրակացության՝ նա «չնայած հրամանին» և առանց թույլտվության ՝ «երկու հրթիռ է արձակել» ինքնաթիռի վրա։ Նշվում է, որ օպերատորի գործողությունները «պայմանավորված են եղել իրավիճակի վերաբերյալ չտեղեկացվածությամբ և հայտնաբերված թիրախը թշնամական լինելու սխալ համոզմամբ»։
Մյուս ինը դատապարտյալներ դատապարտվել են մեկից երեք տարվա ազատազրկման: Նրանց անունները չեն նշվում։ Դատավճիռները կայացվել են երեք տարվա քննությունից հետո: «Այս գործի քննությունը երկրում անցած մի քանի տարիների ընթացքում ամենակարևոր, նուրբ և բարդ դատավարություններից մեկն էր»,- ասվում է հաղորդագրության մեջ։
Հիշեցնենք, որ ուկրաինական Boeing 737-800 ինքնաթիռը կործանվել էր 2020 թվականի հունվարի 8-ին Թեհրանի օդանավակայանից Կիև թռիչքի մեկնարկից շատ չանցած: 176 զոհվածների թվում եղել էին Աֆղանստանի, Մեծ Բրիտանիայի, Գերմանիայի, Իրանի, Կանադայի, Ուկրաինայի և Շվեդիայի քաղաքացիներ։ Հունվարի 11-ին Իրանը հայտարարեց, որ այն սխալմամբ խոցվել է, քանի որ զինվորականներն այն ընդունել են որպես «թշնամական թիրախ»։
Տաթև Ֆռանգյան
