Հարավային Կորեան, ԱՄՆ-ը և Ճապոնիան զորավարժություններ են սկսել Ճապոնական ծովում

Հարավային Կորեան, ԱՄՆ-ը և Ճապոնիան հակահրթիռային պաշտպանության զորավարժություններ են սկսել Ճապոնական ծովի միջազգային ջրերում։ Վարժանքներին մասնակցում է հարավկորեական ավելի քան 60 ռազմական ինքնաթիռ, այդ թվում՝ F-35A, F-15K և KF-16 կործանիչներ, ինչպես նաև՝ ԱՄՆ ռազմաօդային ուժերի մոտ 40 ինքնաթիռ` F-16 կործանիչներ, ծովային հետեւակի կորպուսի A-10 գրոհային ինքնաթիռներ և F-35B, FA-18 ռեակտիվ ինքնաթիռներ, փոխանցում է DW-ի ռուսական ծառայությունը։

Բացի այդ, դրանցում ներգրավված են հարավկորեական Yulgok Yi ականակիր նավը, ամերիկյան հրթիռային USS Benfold նավը և ճապոնական Atago-ն։
Համատեղ զորավարժություններն ուղղված են անվտանգության ոլորտում համագործակցության խորացմանը և ԿԺԴՀ-ի կողմից աճող հրթիռային սպառնալիքներին ավելի արդյունավետ հակազդելուն, հայտնել են Հարավային Կորեայի ռազմածովային ուժերը։ Վարժանքի նպատակն է բարձրացնել երեք երկրների կործանիչների փոխգործունակությունն ու համատեղ օպերատիվ կարողությունները։

Զորավարժություններն անցկացվում են Վաշինգտոնում ձեռք բերված պայմանավորվածությունից օրեր անց՝ որպես դիվանագիտական և ռազմական համագործակցության ընդլայնման մաս՝ հակահրթիռային պաշտպանության և հակասուզանավային պաշտպանության կանոնավոր վարժանքներ անցկացնելու եռակողմ բանակցություններից հետո:

Հիշեցնենք, որ տարեսկզբից Հյուսիսային Կորեան մի շարք հրթիռային զորավարժություններ է անցկացրել և միջուկային հարվածի սպառնալիքներ է հնչեցրել, ինչը հանգեցրել է Կորեական թերակղզում իրավիճակի նոր սրման։