21.01.2026 | 23:30
Ինչ իրավիճակ է Հայաստանի ճանապարհներին և Լարսում
Բռնի կուսակցականացման վերջը. Կարեն Կարապետյանը միայնա՞կ կհեռանա, թե՞ թիմով՝ ինչպես եկել էր. ՏԵՍԱՆՅՈՒԹ
Քաղաքականություն
26.06.2018 | 20:50
ՀՀԿ նախագահի առաջին տեղակալի պաշտոնից հրաժարական է ներկայացրել նախկին վարչապետ Կարեն Կարապետյանը: ՀՀԿ-ից այս օրերին ելքերը շատ են՝ դպրոցի ուսմասվարից մինչև ԱԺ պատգամավոր: Երբեմն այն ստանում է առնետավազք բնորոշումը, սակայն Կարեն Կարապետյանի դեպքն այս տրամաբանության շրջանակներում չէ: Սա ընդամենը կոչվում է բռնի կուսակցականացման թոթափում, որը կարող է տարածվել նաև Կարապետյանի թիմի վրա:
Տեսանյութն այն մասին է, թե ինչպես նախորդ կառավարության գերակշիռ մասը մեկ մարդու պես անդամակցեց ՀՀԿ-ին՝ կամովին կամ պարտադրված՝ անկախ կուսակցության գաղափարախոսության մասին պատկերացումներից, այն ընդունել-չընդունելուց:
ՀՀԿ-ն Կարեն Կարապետյանին քամեց որքան կարող էր՝ նախ անունն օգտագործելով ընտրություններում առավել քվե տանելու համար, իսկ մինչ այդ՝ նրա շնորհիվ համալրելով կուսակցությունը բազմաթիվ մարդկանցով, որոնց շարքերում՝ «Գազպրոմ Արմենիայի» 7000 աշխատակիցներ: Եվ հայտնի էր արդեն, որ նույն կայծակնային արագությամբ էլ կարող է ՀՀԿ-ն կորցնել բազում կուսակցականների, մանավանդ՝ գործարար թևի, որոնք ակամա սերտաճել էին կուսակցությանը:
Միայն թե ՀՀԿ-ի դեպքում ամենագլխավոր իրողությունն այն է, որ իշխանության պատասխանատվությունը վերցնելու ողջ ընթացքում այդպես էլ չկարողացավ պարզել՝ քանի իրական անդամ ունի, իրական՝ երդվյալ ՀՀԿ-ականի իմաստով:
Հուսանք՝ նոր գործընթացների պարագայում գոնե կարող են պարզել` վերջնական ելքերի արդյունքում:
Սևակ Հակոբյան
