14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Բոսնիա և Հերցեգովինան Ադրբեջանի հետ ռազմավարական գործընկերության հռչակագիր է ստորագրել
Քաղաքականություն
14.04.2023 | 14:19
Ադրբեջանի նախագահ Իլհամ Ալիևը նախօրեին պաշտոնական այցով Բոսնիա և Հերցեգովինայում էր։ Այցի ընթացքում երկու երկրների միջև ստորագրվել է ռազմավարական գործընկերության հռչակագիր, գրում են ադրբեջանական լրատվամիջոցները։։ Փաստաթուղթը ստորագրել են Բոսնիա և Հերցեգովինայի նախագահության ղեկավար Ժելիկա Ցվիյանովիչը և Ադրբեջանի նախագահ Իլհամ Ալիևը Սարաևոյում։
«Մենք որոշել ենք լինել ռազմավարական գործընկերներ, և վստահ եմ, որ այդպես էլ վարվելու ենք։ Այս հռչակագիրը կօգնի հասնել ավելի լավ փոխըմբռնման, քաղաքական խորհրդակցությունների, բարելավելու տնտեսական համագործակցությունը և հիմք կհանդիսանա անվտանգության ոլորտում առավել արդյունավետ համագործակցության համար»,- ասել է Ցվիյանովիչը ստորագրման արարողության ժամանակ։
Ալիևն էլ իր հերթին նշել է, որ ստեղծվելու է համատեղ տնտեսական հանձնաժողով, քննարկվել են կոնկրետ նախագծեր, իսկ աշխատանքային խմբերը մոտ ապագայում կոնկրետ միջոցներ են ձեռնարկելու։
«Մենք հետաքրքրված ենք Ձեր երկրում ներդրումներով, հատկապես՝ էներգետիկայի ոլորտում, ինչպես նաև՝ հարևան երկրներում ենթակառուցվածքային նախագծերով։ Բալկանները մեզ համար մեծ նշանակություն ունեն»,- ասել է Ադրբեջանի նախագահը։
Էմմա Չոբանյան
