Քաղաքականություն
14.04.2023 | 16:06
Չինաստանը, ըստ ամերիկյան հետախուզության, կարող էր համաձայնվել Ռուսաստանին զենք կամ զինամթերք մատակարարել՝ քողարկելով քաղաքացիական բեռների տակ։ Այս մասին գրում է Washington Post-ը՝ հիմնվելով արտահոսած գաղտնի փաստաթղթերի վրա։ Թերթի տվյալներով՝ այս տարվա փետրվարի 23-ով թվագրված փաստաթղթերից մեկը վերաբերում է ամերիկացիների կողմից գաղտնալսված ՌԴ արտաքին հետախուզության հաղորդագրությանը, ըստ որի՝ Չինաստանի Կենտրոնական ռազմական հանձնաժողովը հավանություն է տվել զենքի հետագա գաղտնի մատակարարմանը։
The Washington Post-ը հիշեցնում է, որ հենց փետրվարի վերջին էլ ԱՄՆ պետքարտուղար Էնթոնի Բլինքենը և ԱՄՆ վարչակազմի այլ պաշտոնյաներ հայտնեցին, որ, իրենց տեղեկություններով, Չինաստանը մտածում է Ռուսաստանին զենք վաճառելու մասին։
Պեկինը պարբերաբար հայտարարում է, որ ներկա պատերազմում հավատարիմ է մնում խիստ չեզոք դիրքորոշման և խաղաղության կոչ է անում։
Ավելի ուշ ԱՄՆ-ի և Ուկրաինայի պաշտոնյաները հայտարարեցին, որ տեղեկություն չունեն, որ Չինաստանն իրականում զենք է մատակարարում Ռուսաստանին:
Հիշեցնենք, որ բաց հարթակներում հայտնված Պենտագոնի փաստաթղթերը մանրամասն տվյալներ են պարունակում Կիևին ԱՄՆ-ի և Արևմուտքի կողմից ցուցաբերվող ռազմական օգնության, դրա ծավալի, մատակարարումներիի ընթացքի, ինչպես նաև հատուկ ռազմական գործողության, միջազգային կարևոր այլ խնդիրների մասին, այդ թվում՝ այլ երկրների ու տարածաշրջանների նկատմամբ ամերիկյան քաղաքականության, նախատեսվող քայլերի ու ծրագրերի մասին։
Այդ փաստաթղթերը, բացի Ուկրաինային ռազմական օգնության մասին մանրամասն տվյալներից նաև մասնագիտական գնահատականներ ու տվյալներ են պարունակում Ուկրաինայի բանակի մասին, ինչպես նաև վերլուծություններ ու գնահատականներ Չինաստանում, Ասիայում, Խաղաղօվկիանոսյան տարածաշրջանում, Մերձավոր Արևելքում և այլ երկրներում զարգացումների մասին։
Ըստ որոշ գնահատականների ՝ համացանցում հայտնված այս գաղտնի փաստաթղթերը, որոնք նախատեսված չեն եղել հրապարակման համար, կարող են հարված հասցնել ԱՄՆ-ի ազգային անվտանգությանը, քանի որ դրանք ի սկզբանե անգամ ԱՄՆ-ի դաշնակիցների համար են անհասանելի եղել։
Տաթև Ֆռանգյան
