ԱՄՆ հետախուզության փաստաթղթերի արտահոսքի մեջ կասկածվողը ձերբակալվել է

ԱՄՆ հետախուզության փաստաթղթերի արտահոսքի մեջ կասկածվող Ջեք Թեյշեյրան ձերբակալվել է, հայտնում են CNN-ը:

The New York Times-ն իր հերթին մեջբերում է Հետախուզության դաշնային բյուրոյի (ՀԴԲ) հայտարարությունը, որը վերաբերում է Մասաչուսեթսի Հյուսիսային Դեյթոն քաղաքում տեղի ունեցած ձերբակալությանը:

Հայտարարության մեջ անունը չի նշվում, սակայն, որ կասկածյալը Մասաչուսեթսի ազգային գվարդիայի 21-ամյա աշխատակից Ջեք Թեյշեյրան է, երեկ օրվա ընթացքում հայտնել էին ամերիկյան մի քանի առաջատար լրատվամիջոցներ՝ վկայակոչելով իրավապահ մարմիններին։

Reuters-ը հայտնում է, որ ԱՄՆ գլխավոր դատախազ Մերրիկ Գարլանդը շուտով պաշտոնական հայտարարություն կանի այդ կապակցությամբ։

Հիշեցնենք, որ բաց հարթակներում հայտնված Պենտագոնի փաստաթղթերը մանրամասն տվյալներ են պարունակում Կիևին ԱՄՆ-ի և Արևմուտքի կողմից ցուցաբերվող ռազմական օգնության, դրա ծավալի, մատակարարումներիի ընթացքի, ինչպես նաև հատուկ ռազմական գործողության, միջազգային կարևոր այլ խնդիրների մասին, այդ թվում՝ այլ երկրների ու տարածաշրջանների նկատմամբ ամերիկյան քաղաքականության, նախատեսվող քայլերի ու ծրագրերի մասին։

Այդ փաստաթղթերը, բացի Ուկրաինային ռազմական օգնության մասին մանրամասն տվյալներից նաև մասնագիտական գնահատականներ ու տվյալներ են պարունակում Ուկրաինայի բանակի մասին, ինչպես նաև վերլուծություններ ու գնահատականներ Չինաստանում, Ասիայում, Խաղաղօվկիանոսյան տարածաշրջանում, Մերձավոր Արևելքում և այլ երկրներում զարգացումների մասին։

Ըստ որոշ գնահատականների ՝ համացանցում հայտնված այս գաղտնի փաստաթղթերը, որոնք  նախատեսված չեն եղել հրապարակման համար, կարող են հարված հասցնել ԱՄՆ-ի ազգային անվտանգությանը, քանի որ դրանք ի սկզբանե անգամ ԱՄՆ-ի դաշնակիցների համար են անհասանելի եղել։

Տաթև Ֆռանգյան