Ռուս և բելառուս ծանրորդները չեն ընդգրկվել ապրիլի 15-23-ը Երևանում կայանալիք Եվրոպայի առաջնության մասնակիցների վերջնական հայտացուցակում:
«Միջազգային օլիմպիական կոմիտեն և ֆեդերացիան տվել են ուղեցույցները բոլոր երկրների ներկայացուցիչների մասնակցության և անվտանգության ապահովման համար․ որևէ կանոն կամ կարգ չի խախտվել։
Դեռևս քննարկումներ են ընթանում, թե ինչպես կարող են Ռուսաստանի և Բելառուսի ծանրամարտի կանանց և տղամարդկանց թիմերը մասնակցել»,- այսօր հրավիրված ասուլիսի ընթացքում այս մասին նշեց Եվրոպայի Ծանրամարտի Ֆեդերացիայի նախագահ Անտոնիո Կոնֆլիտտին։
Ծանրամարտի միջազգային ֆեդերացիայի նախագահ Մուհամեդ Ջալուդը հավելեց, որ Ռուսաստանն այս դեպքում պատժամիջոցի չի ենթարկվել, ուղղակի այս առաջնությանը չեն մասնակցի՝ անվտանգության նկատառումներից ելնելով։
Մենք միտում չունենք ազնիվ մարզիկներին առաջնությանը մասնակցելու հնարավորությունից զրկելու»,- վստահեցրեց Ծանրամարտի միջազգային ֆեդերացիայի նախագահը։
Նշենք, որ Ծանրամարտի Եվրոպայի առաջնությունը կկայանա Երևանի Կարեն Դեմիրճյանի անվան մարզահամերգային համալիրում ապրիլի 15-23-ը: Անկախ Հայաստանի պատմության մեջ առաջին անգամն է, որ Երևանն ընդունում նման խոշորամասշտաբ մրցաշար: Ծանրամարտի Եվրոպայի առաջնությունը վարկանիշային է Փարիզի 33-րդ ամառային Օլիմպիական խաղերի համար: Առաջնությանը կմասնակցեն մոտ 40 երկրի 500-ից ավել մարզիկներ: Ընդհանուր պատվիրակությունների թիվը կգերազանցի 1000-ը: Առաջնության բացման պաշտոնական արարողությունը կկայանա ապրիլի 14-ին:
Մանրամասները՝ տեսանյութում։
