Երկրի տեսանելիությունն է մեծանում. Հարությունյանը` ծանրամարտը հատուկ պայմաններով անցկացնելու մասին․ ՏԵՍԱՆՅՈՒԹ

Ծանրամարտի Եվրոպայի առաջնությունը կկայանա Երևանի Կարեն Դեմիրճյանի անվան մարզահամերգային համալիրում ապրիլի 15-23-ը: Անկախ Հայաստանի պատմության մեջ առաջին անգամն է, որ Երևանն ընդունում է նման խոշորամասշտաբ մրցաշար: Ծանրամարտի Եվրոպայի առաջնությունը վարկանիշային է Փարիզի 33-րդ ամառային Օլիմպիական խաղերի համար: Առաջնությանը կմասնակցեն մոտ 40 երկրի 500-ից ավել մարզիկներ: Ընդհանուր պատվիրակությունների թիվը կգերազանցի 1000-ը: Առաջնության բացման պաշտոնական արարողությունը կկայանա ապրիլի 14-ին:

«Բացի մարզական բաղադրիչից՝ այստեղ երկրի տեսանելիության հարց կա։ Երբ դու անցկացնում ես մեծ միջոցառումներ՝ ոչ միայն մարզական, ինչպիսին, օրինակ, Եվրատեսիլն էր, Սթարմուս փառատոնն էր, Բռնցքամարտի առաջնությունն էր, երկրի տեսանելությունը մեծանում է, այդ երկրի մասին սկսում են շատ գրել, այդ երկրով սկսում են հետաքրքրվել։ Այդ երկիրը գրավում է ոչ միայն մարզասերների, այլ նաև զբոսաշրջիկների ուշադրությունը։ Սա հնարավորություն է՝ հյուրընկալելու մարզիկներին, որոնք իրենց հետ Հայաստանից «մի կտոր» կտանեն և, ինչու չէ, նաև նրանց երկրպագուները կլինեն ՀՀ մայրաքաղաքում և կվայելեն այդ օրերն այստեղ։ Երևանն այդ երկու շաբաթների ընթացքում, առանց չափազանցության, լինելու է ոչ միայն Եվրոպայի, այլ նաև աշխարհի ծանրամարտի մայրաքաղաքը»,- այս մասին այսօր հրավիրված ասուլիսում նշոց ՀՀ վարչապետի աշխատակազմի ղեկավար Արայիկ Հարությունյանը։

Մանրամասները՝ տեսանյութում։