Ըստ ՌԴ ԱԴԾ-ի՝ Պետերբուրգում ահաբեկչության կազմակերպիչներից մեկը Հայաստանով տարանցմամբ մեկնել է Թուրքիա

ՌԴ ԱԴԾ-ն պնդում է՝ Դարյա Տրեպովան, որը կալանավորվել էր Պետերբուգում տեղի ունեցած պայթյունի գործով, հանցագործությունը կատարել է ՖԲԿ-ի ղեկավարներ՝ Լեոնիդ Վոլկովի ու Իվան Ժդանովի կոչերի արդյունքում, գրում է Meduza-ն։ Ըստ գերատեսչության՝ Տատարսկու սպանությունը Տրեպովայի հետ միասին նախապատրաստել է Ուկրաինայի քաղաքացի Յուրի Դենիսովը՝ ծնված 1987 թ-ին, որն էլ նրան է փոխանցել պայթուցիկ սարք՝ «գիպսե կիսանդրիի տեսքով»։ Տրեպովան սարքը ստացել է Մոսկվայում՝ միջնորդի միջոցով «էքսպրես առաքում» ծառայությամբ։

ԱԴԾ-ն Դենիսովին անվանում է «ուկրաինական դիվերսիոն-ահաբեկչական խմբավորման» անդամ։ Գերատեսչության տվյալներով՝ Դենիսովը «ուկրաինական հատուկ ծառայությունների ցուցումով» 2023 թվականի փետրվարին Կիևից Լատվիայով ժամանել է Մոսկվայի մարզ, որտեղ տեղեկություններ է հավաքել ռազմական բլոգերի կենսակերպի մասին։ Դրա համար էլ նա մեքենա է գնել և բնակարան վարձել  Տատարսկու բնակության վայրին մոտ։ ԱԴԾ-ն նաև նշում է, որ ապրիլի 3-ին՝ «ահաբեկչության իրականացումից հետո Դենիսովը  Ռուսաստանից տրանզիտով Հայաստանի տարածքով մեկնել է Թուրքիա»։ Դենիսովի նկատմամբ միջազգային հետախուզում է հայտարարվել։

Հավելենք, որ ապրիլի 2-ին Պետերբուրգում Street Food Bar № 1 սրճարանում, որը պատկանում է «Վագներ»խմբավորման հիմնադիր Եվգենի Պրիգոժինին, տեղի էր ունեցել պայթյուն ռազմական բլոգեր, լրագրող Վլադլեն Տատարսկիի  ստեղծագործական երեկոյի ժամանակ։ Պայթյունի հետևանքով Տատարսկին մահացել էր, 40 մարդ վիրավորում էր ստացել։

Էմմա Չոբանյան