«Վագները» փորձել է զենք գնել Թուրքիայից

CNN-ն ուսումնասիրել է արտահոսած ամերիկյան գաղտնի փաստաթղթերը և եկել եզրահանգման, որ «Վագները» փորձել է զենք գնել Թուրքիայից՝  Ուկրաինայի պատերազմում և այլ հակամարտություններում օգտագործելու համար։

Ամերիկյան հետախուզական ծառայությունների զեկույցից, որը վկայակոչված է փաստաթղթում, հետևում է, որ «Վագների» ներկայացուցիչները փետրվարի սկզբին հանդիպումներ են ունեցել Թուրքիայում՝ «զենք և տեխնիկա ձեռք բերելու համար», որը կարող է հետագայում օգտագործվել ուկրաինական զորքերի դեմ կռվող վարձկանների կողմից։ Նույն փաստաթղթից բխում է նաև, որ վարձկանները պատրաստվում էին դրա մի մասն օգտագործել Մալիում, որտեղ «Վագներն» ունի իր շահերը։ Ու թեև «Մալի, Ռուսաստան, Թուրքիա. «Վագները» զենք է փնտրում Անկարայում» վերնագրով փաստաթուղթը որևէ ապացույց չի ներկայացնում առքուվաճառքի մեկնարկի մասին, ըստ ամենայնի, ամերիկացիները լրջորեն են վերաբերվել նման փորձին։ Թուրքիան ՆԱՏՕ-ի լիիրավ անդամ է, մի դաշինքի, որն ուղղակի ռազմական օգնություն է տրամադրում Կիևին: Թուրքիայում է նաև ԱՄՆ-ի հիմնական ռազմաբազան, որտեղ միջուկային զենք է պահվում: Հետևաբար՝ ցանկացած նշան, որ Թուրքիան կարող է քննարկել ռուս վարձկաններին զենք վաճառելու հարցը, չի կարող լուրջ անհանգստություն չառաջացնել Վաշինգտոնում և կարող է բարդացնել Թուրքիայի հարաբերությունները ՆԱՏՕ-ի գործընկերների հետ:

CNN-ը չի ստացել կոնկրետ այս փաստաթղթի իսկության հաստատում, սակայն ԱՄՆ իշխանություններն ավելի վաղ արձանագրել էին, որ արտահոսած նյութերի մեծ մասը իրական է։

Տաթև Ֆռանգյան