06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
ՌԴ ԱԳՆ-ն Հայաստանից պաշտոնական բացատրություն է պահանջել ՆԱՏՕ-ի զորավարժություններին մասնակցելու վերաբերյալ
Քաղաքականություն
12.04.2023 | 18:16
Ռուսաստանը Հայաստանից պաշտոնական բացատրություն է պահանջել ՆԱՏՕ-ի երկրների հետ համատեղ զորավարժություններին հայկական կողմի մասնակցության վերաբերյալ հստակեցման խնդրանքով։ Այս մասին իր ամենշաբաթյա ճեպազրույցի ժամանակ հայտարարել է ՌԴ ԱԳՆ ներկայացուցիչ Մարիա Զախարովան։
«Մենք պաշտոնական բացատրություն ենք պահանջել մեր հայ գործընկերներից ՆԱՏՕ-ական վարժանքներին մասնակցելու վերաբերյալ։ Մենք կորոշենք մեր արձագանքը պատասխանը ստանալուց հետո»,- հայտարարել է ՌԴ ԱԳՆ ներկայացուցիչը։
Նրա խոսքով՝ Հավաքական անվտանգության պայմանագրի կազմակերպության շրջանակներում իր տարածքում զորավարժություններ անցկացնելու շուրջ հայկական կողմի մերժումը Մոսկվայի ափսոսանքն է հարուցում: Ըստ Զախարովայի՝ այս որոշումը չի նպաստում տարածաշրջանային անվտանգության ամրապնդմանը։
Հիշեցնենք՝ Ապրիլի 6-ին Պենտագոնի կայքում «Defender 2023» բազմազգ զորավարժության մասին հաղորդագրության մեջ մասնակից երկրների ցուցակում նշված է եղել նաև Հայաստանի անունը: Որոշ ժամանակ անց, սակայն, ԱՄՆ պաշտպանական գերատեսչությունը խմբագրել էր հաղորդագրությունը, և Հայաստանի անունը հանվել էր մասնակիցների ցանկից:
Պարզաբանում ստանալու համար «Արմենպրես»-ը դիմել էր ՀՀ պաշտպանության նախարարի մամուլի խոսնակ Արամ Թորոսյանին։
Հարց. Երեկ ԱՄՆ պաշտպանական գերատեսչության կայքում «Defender 2023» բազմազգ զորավարժության մասին հաղորդագրության մեջ մասնակից երկրների ցուցակում նշված էր նաև Հայաստանը: Որոշ ժամանակ անց Պենտագոնը խմբագրեց հաղորդագրությունը, և Հայաստանն այլևս մասնակիցների ցանկում ներառված չէր: Վերջիվերջո, ՀՀ ԶՈւ-ն մասնակցելո՞ւ է այդ զորավարժությանը:
Պատասխան․ ՀՀ պաշտպանության նախարարությունը ընթացիկ տարում պլանավորում է մասնակցել Եվրոպայում ԱՄՆ ցամաքային զորքերի հրամանատարության կողմից կազմակերպվող 2 այլ զորավարժությունների՝ KFOR (Կոսովոյի ուժեր) և Saber Junction (Միաձուլված սուր) զորավարժություններին:
