ՀՀ-ն կազատագրվի ՌԴ-ի ստրկատիրությունից՝ հենց Ուկրաինան հաղթի․ Մանուկ Դեպոյան․ ՏԵՍԱՆՅՈՒԹ

Ուկրաինայի դեմ Ռուսաստանի սկսած պատերազմն ընթանում է արդեն ավելի քան 400 օր։ Ինչպես է փոխվել ուկրաինահայերի, ընդհանրապես՝ Ուկրաինայի քաղաքացիների կյանքը, սա ինչ պատերազմ է․ այս և այլ հարցերի շուրջ Factor TV-ին զրուցել է Ուկրաինայում բնակվող ռեժիսոր, անիմատոր, սցենարիստ Մանուկ Դեպոյանի հետ։ Ըստ նրա՝ ամեն օր ինքը և ուկրաինացիները սպասում են հարձակումների, ռուսական ռմբակոծությունների, երբ հայտնի չէ, թե հաջորդ պայթյունը որտեղ կլինի։

Մանուկ Դեպոյանը ուկրաինական առաջին 3D լիամետրաժ մուլտֆիլմի հեղինակն է։ Միջազգային շուկայում հաջողության հասած «Նիկիտա Կաժեմյակը» անիմացիոն ֆիլմի հեղինակն է, բազմաթիվ փառատոնների դափնեկիր։ Թեև պատերազմը թեժ ընթացքի մեջ է, Դեպոյանը չի դադարեցնում աշխատանքը՝ միայն տագնապի ազդանշաններն են խանգարում․ հարկադրված են լինում իջնել ռմբապաստարան։

Ռուսաստանը պատրաստվում է մինչև հունիս  Բելառուսի տարածքում միջուկային զինանոց տեղակայել ։ Լուկաշենկոն Շոյգուից պաշտպանություն խնդրեց՝ հարձակման ենթարկվելու դեպքում։ Միաժամանակ, ԱՄՆ-ն է սկսում այս շաբաթ միջուկային ուժերի պատրաստության ստուգման զորավարժություններ։ Թեև զորավարժությունն ամենամյա է, և ինչպես ԱՄՆ-ն է հայտնել և ընդգծել, որ դրանք պատասխան չեն որևէ պետության գործողություններին, ամեն դեպքում՝  Մանուկ Դեպոյանը պատմում է․ «Ատոմային զենքի կիրառման վտանգ ենք զգում Ուկրաինայում․ ՌԴ-ին առիթ է պետք՝ դա անելու»։

Ռուսաստանը թեև Ուկրաինայի դեմ է այս պահին պատերազմական գործողություններ ծավալում, սակայն ակնհայտորեն՝ հավակնություն ունի հետխորհրդային տարածքի պետությունների վրա լրջագույն ազդեցությունը պահպանելու։ Հայաստանում ևս զգում են ճնշումներ Ռուսաստանից, անգամ՝ կանխատեսում վտանգներ սուվերենությանը, անկախությանը։ Ըստ մուլտիպլիկատորի՝ ռուս-ուկրաինական պատերազմի ելքը կարևոր է նաև ՀՀ-ի համար․

«Հայաստանը կազատագրվի ՌԴ-ի ստրկատիրությունից՝ հենց Ուկրաինան հաղթի։ Այսօր Հայաստանը ռուսական բռունցքի տակ է, երբ փորձում է փոքր-ինչ անկախ քայլեր անել, ճնշում են»,- ասաց Մանուկ Դեպոյանը։

Հարցազրույցն ամբողջությամբ՝ տեսանյութում։

Ռոբերտ Անանյան