Պեսկովը հայտարարել է, որ ՌԴ-ում մոբիլիզացիայի նոր ալիք չի նախատեսվում

Ռուսաստանում մոբիլիզացիայի նոր ալիք չի նախատեսվում։ Այս մասին լրագրողների հետ զրույցում հայտարարել է ՌԴ նախագահի մամուլի խոսնակ Դմիտրի Պեսկովը, գրում է Ինտերֆաքսը։

Լրագրողները Պեսկովի ուշադրությունն են հրավիրել այն շշուկների վրա, որ մոբիլիզացիայի նոր ալիք է նախատեսվում, և հիշեցրել, որ Պեսկովը նախկինում ասել էր, որ այդ հարցը չի քննարկվում։ Կրեմլի խոսնակին հարցրել են՝ արդյո՞ք վերջին շրջանում այս թեմայով փոփոխություններ եղել են։ «Ոչ, նախկինի պես չի եղել ու չկա», – ասել է Կրեմլի խոսնակը։ Պեսկովը նաև հայտարարել է, որ «թվային ծանուցագրերի» օրինագիծը կապ չունի մոբիլիզացիայի հետ։

Լրագրողների այն հարցին, թե արդյո՞ք Կրեմլը մտավախություն չունի, այս փաստաթղթի ընդունումը խուճապ և արտագաղթի նոր ալիք կառաջացնի, Պեսկովը պատասխանել է. «Ո՛չ, քանի որ սա կապված չէ մոբիլիզացիայի հետ, այլ կապված է զինվորական հաշվառման հետ։ Սա պետք է հասկանալ և բացատրել։ Զինվորական հաշվառումը մի բան է, որին մեր երկրի քաղաքացիները, ըստ Սահմանադրության՝ բախվում են անընդհատ, կյանքում գոնե մեկ անգամ։ Ըստ այդմ՝ համակարգը պետք է համընթաց քայլի ժամանակի պահանջներին»։ Նա նշել է, որ այժմ աշխատանք է տարվում փորձագիտական մակարդակով և ամեն ինչ կպարզվի։

«Մինչ այժմ, իսկապես, շատ հարցեր կան՝ էլեկտրոնային փոստով, ինչպես է դա իրականացվելու, ինչի հիման վրա։ Խոսվում է «պետական ծառայությունների մասին», սակայն դրանք պարտադիր չեն։ Դրա համար այստեղ, իսկապես, շատ նրբություններ կան»,- ասել է Պեսկովը՝ նշելով, որ  ընդհանուր առմամբ, այդ աշխատանքն անհրաժեշտ է և պետք է արդիականացնել ռազմական հաշվառման համակարգը։

Հիշեցնենք, որ ՌԴ Պետդուման քննարկում է փոփոխությունները, որոնք նախատեսում են էլեկտրոնային ծանուցագրերի ուղարկում։

Էմմա Չոբանյան