16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Բայդենը մտադիր է մասնակցել 2024-ի նախագահական ընտրություններին․CNN
Քաղաքականություն
10.04.2023 | 18:41
ԱՄՆ նախագահ Ջո Բայդենը որոշել է մասնակցել 2024 թվականի ընտրություններին որպես Դեմոկրատական կուսակցության թեկնածու, հայտնում են ամերիկյան NBC News և CNN հեռուստաալիքները։ Բայդենը, սակայն, պաշտոնական հայտարարություն չի արել ընտրություններին իր մասնակցության մասին։
NBC News-ի փոխանցմամբ՝ Միացյալ Նահանգների նախագահը չի շտապի հրապարակայնորեն հայտարարել իր թեկնածությունը երկրորդ ժամկետի համար։ Հեռուստաալիքը երկու պատճառ է նշում՝ Հանրապետական կուսակցությունից ԱՄՆ նախկին նախագահ Դոնալդ Թրամփի նկատմամբ քրեական հետապնդման հետ կապված իրավիճակն ու 2024 թվականի բյուջեի ծախսերի վերաբերյալ Կոնգրեսում հանրապետականների հետ բանավեճերը։ Բայդենի շրջապատն ասում է, որ հետաձգումը նրան թույլ կտա չնախատեսված հանգամանքների դեպքում հրաժարվել առաջադրվելուց և սատարել դեմոկրատ մեկ այլ թեկնածուի, նշում է NBC News-ը։
CNN-ը պարզաբանում է, որ Ջո Բայդենը դեռ չի որոշել առաջադրման օրը, նախընտրական շտաբի գտնվելու վայրը և նախընտրական արշավի ղեկավարին։ CNN-ի աղբյուրների համաձայն՝ Ջո Բայդենը ընտրություններին մասնակցելու մասին հրապարակավ կհայտարարի 2023 թվականի ամռանը։
Մինչ այժմ Դեմոկրատական կուսակցությունից նախագահի թեկնածու առաջադրվելու հայտ են ներկայացրել ԱՄՆ նախկին նախագահ Ջոն Քենեդիի եղբորորդին՝ Ռոբերտ Քենեդի կրտսերը և գրող Մարիան Ուիլյամսոնը, հանրապետականներից՝ Դոնալդ Թրամփը, Հարավային Կարոլինայի նախկին նահանգապետ Նիկի Հեյլին և ձեռնարկատեր Վիվեկ Ռամասվամին:
Տաթև Ֆռանգյան
