Իլոն Մասկը հրաժարվել է ջնջել Դմիտրի Մեդվեդևի՝ Ուկրաինայի «անհետացման» մասին թվիթը

Twitter-ի սեփականատեր Իլոն Մասկը հրաժարվել է ջնջել ՌԴ Անվտանգության խորհրդի փոխնախագահ Դմիտրի Մեդվեդևի՝ Ուկրաինայի «անհետացման» մասին գրառումը, գրում է Meduza-ն։ Մասկը պատասխանել է օգտատերերից մեկի գրառմանը, որը ՌԴ նախկին նախագահի թվիթը համարել է «ցեղասպանության կոչ»։ «Բոլոր նորություններն այս կամ այն կերպ քարոզչություն են։ Թող մարդիկ իրե՛նք որոշեն»,-գրել է Մասկը։ Մասկը նաև նշել է, որ իրեն ասել են, թե ՌԴ նախագահ Վլադիմիր Պուտինն իրեն «ռազմական հանցագործ»է անվանել Ուկրաինային ցուցաբերած օգնության համար, դրա համար էլ «նա հաստատ իր լավագույն ընկերը չէ»։ Մեկ այլ պատասխանում Մասկը գրել է, որ Twitter-ը «ո՛չ խթանելու, ո՛չ սահմանափակելու» է Ռուսաստանի պետական ​​կառույցների օգտահաշիվները։

«Սակայն  մենք արագորեն կդադարեցնենք համակարգը խաբեության համար օգտագործելու փորձերը։ Գրաքննություն մտցնել միայն այն պատճառով, որ դա անում են ուրիշները, թուլություն է: Թույլ տալ, որ մեր մամուլն ազատ լինի, երբ իրենցն ազատ չէ, ուժի ցուցադրություն է»,- ասել է սոցցանցի սեփականատերը։

Հիշեցնենք՝ Մեդվեդևի անգլերեն օգտահաշվում ապրիլի 8-ին հայտնվել էր Ուկրաինայի «անհետացման» մասին գրառում։ Նմանատիպ գրառում ռուսերենով հրապարակվել էր նաև VKontakte-ի էջում։ Դրանում Մեդվեդևը  գրել էր, որ Ուկրաինան «ոչ մեկին օգուտ չի տալիս», ուստի՝ այն «կանհետանա»։ Ըստ ռուս պաշտոնյայի՝ «Ուկրաինան պետք չէ Եվրոպային, ԱՄՆ-ին, Աֆրիկային, Լատինական Ամերիկային, Ասիային, Ռուսաստանին ու հենց ուկրաինայի քաղաքացիներին»։

Էմմա Չոբանյան