Որպես պատիժ՝ Մանվել Գրիգորյանը զինվորներին հավաբնում էր պահում. Ավետիք Իշխանյան. ՏԵՍԱՆՅՈՒԹ

Ազգային ժողովի ՀՀԿ խմբակցության պատգամավոր, գեներալ Մմանվել Գրիգորյանի մասին Ազգային անվտանգության ծառայության աղմկահարույց  բացահայտումները փոքր դրվագներ են այն ամենից, ինչ արել է Մանվել Գրիգորյանը: Factor.am-ի հետ զրույցում նման տեսակետ հայտնեց Հայաստանի Հելսինկյան կոմիտեի նախագահ, իրավապաշտպան Ավետիք Իշխանյանը:

«Պատերազմի և հետպատերազմի շրջանում, եթե դուք հարցնեք, այն ժամանակ ծառայածներին կամ նրանց հարազատներին, կպատմեմ՝ այն ժամանակ ոնց էին սարսափում, որ հանկարծ իրենց երեխան չընկնի Մանվել Գրիգորյանի զորամասը: Որպես պատիժ՝ նա զինվորներին հավաբնում էր պահում, շահագործում էր նրանց և այլն… Ովքեր նրա զորամասում են ծառայել, ունեցել են դժոխային ծառայություն»,- նշեց իրավապաշտպանը՝ նկատելով, որ այդ ամենը պետք է բացահայտվի:

Իրավապաշտպանը վստահ է՝  «մանվելների»  ծառայություններից օգտվել է ոչ միայն Սերժ Սարգսյանը, այլև նրա նախորդները, որոնց միայն հետաքրքրել է՝ իշխանությունը պահելը:

«Մանվել Գրիգորյանին ծնողը Վազգեն Սարգսյանն էր, որ այսօր Ազգային հերոս է և պակաս վայրենություններ չի գործել: Երբ Վազգեն Սարգսյանը 1995-1999 պաշտպանության նախարար էր, բանակում խաղաղ պայմաններում ամենից շատ զոհերն ունեցանք և ոչ մեկն այդ ամենի համար պատասխան չի տվել», – շեշտեց իրավապաշտպանը:

Ավետիք Իշխանյանը, անդրադառնալով Մանվել Գրիգորյանի կալանավորմանն ու նրա փաստաբանների ահազանգերին, նաև ընդգծեց՝  ամենածանր հանցագործությունների համար կասկածվող կամ մեղադրվող անձն անգամ իրավունք ունի ունենալու փաստաբան, ընդ որում՝ որակյալ փաստաբան: Իշխանյանը նշեց՝  ցանկալի կլիներ, որ Մանվել Գրիգորյանի փաստաբանները դուրս չգային իրավական շրջանականներից և չքաղաքականացնեին հարցը:

Հարցազրույցն ամբողջությամբ՝ տեսանյութում:

Շողիկ Գալստյան