Կառավարությունում մտածելակերպ է փոխվել. պետությունը, պարզվում է, լավ կառավարիչ է. ՏԵՍԱՆՅՈՒԹ

Հունիսի 21-ի նիստում կառավարությունը ուժը կորցրած ճանաչեց «Տաշիր-Կապիտալին» «ԲԷՑ»-ը փոխանցելու որոշումը, որը կայացվել էր Կարեն Կարապետյանի կառավարության օրոք՝ 2017 թվականի օգոստոսի 24-ին: Ընկերությունը կշարունակի ղեկավարել պետությունը: Սա հազվագյուտ որոշումներից կարելի է համարել վերջին երկար տարիների ընթացքում:

Բանն այն է, որ անկախության առաջին տարիներից ի վեր Հայաստանում վաճառքի հանվեց գրեթե ամենը, ինչ հնարավոր էր վաճառել՝ պետությունը լավ կառավարիչ չէ, մասնավորն ավելի լավ կկառավարի կարգախոսով: Ընդ որում, վաճառքի հանվեցին ոչ միայն ոչ շահութաբեր, այլև շահույթ ունեցող կազմակերպություններ: Մասնավորի ձեռքը տրվեցին հիվանդանոցներ, հանքեր, ձեռնարկություններ, առևտուր, արտահանում-ներմուծում:

Պետությունը լավ կառավարիչ չէ, մասնավորն ավելի լավ է կառավարում արտահայտությունը լսել ենք բազմիցս՝ թե նախորդ, թե ներկա իշխանության որոշ ներկայացուցիչների շուրթերից:

Եվ միայն առաջին անգամ Հայաստանի կառավարության անդամից լսում ենք մասնավորեցմանը դեմ խոսք և հայտարարություն, որ պետությունն ավելի լավ կառավարիչ է: Նման հիմնավորմամբ ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանն առաջարկեց չեղյալ ճանաչել «Բարձրավոլտ էլոկտրացանցեր» ընկերությունը «Տաշիր գրուպին» հավատարմագրային կառավարման հանձնելու որոշումը:

Կատարվածը հիմք է տալիս ենթադրելու, որ կառավարությունում մտածելակերպ է փոխվել, և կա հնարավորություն մասնավորեցումների շարքը դադարեցնելու կամ գոնե քչացնելու:

Սևակ Հակոբյան