08.10.2026 | 15:01
Հայտնի է ազատ ոճի ըմբշամարտի Հայաստանի հավաքականի կազմն ԱԱ-ում
Բայրամովը՝ Արցախ ՅՈՒՆԵՍԿՕ-ի առաքելություն ուղարկելու մասին
Քաղաքականություն
07.04.2023 | 16:55
Ադրբեջանի ԱԳ նախարար Ջեյհուն Բայրամովը TÜRKSOY-ի անդամ երկրների՝ ՅՈՒՆԵՍԿՕ-ի ազգային հանձնաժողովների 9-րդ նիստի բացման արարողության ժամանակ Հայաստանի հասցեին կրկին կեղծ մեղադրանքներ է հնչեցրել։ Նա, մասնավորապես, հայտարարել է, թե, իբր, Հայաստանը 30 տարի խոչընդոտել է Արցախ ՅՈՒՆԵՍԿՕ-ի առաքելություն ուղարկելուն։
«Վերջին 30 տարիներին հենց Հայաստանն է խոչընդոտել է ՅՈՒՆԵՍԿՕ-ի փաստահավաք առաքելության ուղարկմանը Ղարաբաղի տարածք: Հայաստանը համառորեն մերժել է այդ ուղղությամբ առաջարկները»,- ասել է Բայրամովը։
Նա նշել է, որ Բաքուն, իբր, մշտապես աջակցել է առաքելություն ուղարկելուն։
«ՅՈՒՆԵՍԿՕ-ի Ադրբեջանի ազգային հանձնաժողովը համատեղ աշխատել է բոլոր ուսումնասիրությունների շրջանակում։ Ադրբեջանը մշտապես համագործակցում է ՅՈՒՆԵՍԿՕ-ի հետ կրթության, մշակույթի և այլ ոլորտներում»,- ասել է Ադրբեջանի ԱԳ նախարարը։
Հավելենք, որ Հայաստանը Արցախ ՅՈՒՆԵՍԿՕ-ի առաքելություն ուղարկելուն չի խոչընդոտել և չի խոչընդոտում։
Իսկ Բաքվի կողմից կազմակերպության առաքելություն ուղարկելուն խանգարելու փաստն արձանագրվել է նաև կառույցի կողմից։ Մասնավորապես, 2020 թվականի դեկտեմբերին ՅՈՒՆԵՍԿՕ-ի մշակույթի հարցերով գլխավոր տնօրենի տեղակալ Էռնեստո Օտտոնեն հայտարարել էր, որ Ադրբեջանից դեռ պատասխան չեն ստացել Արցախ կազմակերպության փորձագիտական առաքելություն ուղարկելու համար։
«Առայժմ միայն Ադրբեջանի պատասխանին ենք սպասում, որպեսզի ՅՈՒՆԵՍԿՕ-ն կարողանա առաջ շարժվել առաքելություն ուղարկելու ուղղությամբ»,- ասել էր նա։
Ադրբեջանի տարբեր պաշտոնյաներ էլ, այդ թվում՝ մշակույթի նախկին նախարար Անար Քերիմովը հայտարարել էր, որ կառույցին Բաքուն սեփական պահանջներն է ուղարկել և դրանց բավարարման դեպքում է հնարավոր առաքելության կազմակերպումը։
Էմմա Չոբանյան
