Սոցցանցեր են արտահոսել ԱՄՆ-ի ու ՆԱՏՕ-ի՝ ուկրաինական հարձակման նախապատրաստման ծրագրերը․ New York Times

Ուկրաինական հարձակման նախապատրաստման վերաբերյալ Պենտագոնի և ՆԱՏՕ-ի գաղտնի փաստաթղթերի լուսանկարներ են տարածվել թվիթերում և տելեգրամում։ Այս մասին հայտնում է New York Times-ը՝ հղում անելով Բայդենի վարչակազմի անանուն աղբյուրներին, գրում է BBC-ի ռուսական ծառայությունը։   Փաստաթղթերը մարտի 1-ով են թվագրված, այնպես որ՝ պլանները կարող են փոխված լինել։ Այնտեղ չի խոսվում սպասվելիք հարձակման ամսաթվի ու վայրի մասին, սակայն տեղեկատվություն է պարունակվում  այն մասին, թե Ուկրաինայի քանի բրիգադ է հարձակման պատրաստվում, ինչ քանակությամբ տեխնիկա են նրանք ստանալու։ Նաև այնպիսի տեղեկություններ կան, ինչպիսին է HIMARS-ի  զինամթերքի ամենօրյա սպառումը:

Լրատվականը գրում է՝  այն որ փաստաթղթերը կարող էին փոխվել, վկայում է փաստը, որ սլայդներից մեկում ռուսների զոհերի թիվը գնահատվում է  16-17 հազար, իսկ ուկրաինականինը՝ 71,5 հազար։ Ռուսական կորուստների գնահատականը, ըստ հոդվածագրի, անտրամաբանականորեն ցածր է թվում: Զոհերի իրական թիվը ակնհայտորեն ավելի մեծ է, իսկ  արևմտյան պաշտոնյաները մի քանի անգամ ավելի մեծ թվի մասին են խոսել։ Այս կեղծիքը կարող է վկայել Ռուսաստանի շահերից բխող ապատեղեկատվության փորձի մասին, քանի որ  արտահոսած փաստաթղթերը հայտնվել են ռուսամետ ալիքներում։ Նշվում է, որ ամերիկյան գերատեսչությունները փորձել են հասնել այդ փաստաթղթերի հեռացմանը , սակայն դեռ չեն հաջողել։

«Մենք տեղյակ ենք սոցցանցերում հաղորդագրությունների մասին և նախարարությունը ուսումնասիրում է այդ հարցը»,-New York Times-ին ասել է Պենտագոնի մամուլի խոսնակ Սաբրինա Սինգհը։