Իսրայելը պատասխան հարվածներ է հասցրել Գազային և Լիբանանին

Իսրայելն ավիահարվածներ է հասցրել Գազայի հատվածին ու Լիբանանի հարավային շրջաններին՝ նշելով, որ դրանք ուղղված են ՀԱՄԱՍ արմատական իսլամիստական շարժման թիրախներին, այն բանից հետո, երբ այդ ուղղություններից մի քանի տասնյակ հրթիռներ են արձակվել Իսրայելի տարածքի ուղղությամբ։ Այս մասին հայտնել է Իսրայելի պաշտպանության բանակը։ Հարվածները հասցվել են տեղի ժամանակով ժամը 04։30-ին, գրում է DW-ի ռուսական ծառայությունը։

AFP-ի տվյալներով՝ պայթյուններ են լսվել Լիբանանի հյուսիսում գտնվող Տիր քաղաքից ոչ հեռու, ինչպես նաև Գազայի հատվածում։ Լիբանանի անվտանգությունում աղբյուրները հայտնել են, որ առնվազն 3 պայթյուն է որոտացել այն բանից հետո, ինչ իսրայելական ինքնաթիռները հարվածներ են հասցրել Տիրի մոտ գտնվող պաղեստինյան փախստականների ճամբարի ծայրամասում գտնվող գյուղատնտեսական հողերին:

Իսրայելի պաշտպանության բանակը «թույլ չի տա ահաբեկչական ՀԱՄԱՍ կազմակերպությանը գործել Լիբանանից և այդ պետությանը պատասխանատու է համարում իր տարածքից ցանկացած ուղղորդված կրակի համար», -ասվում է հայտարարության մեջ։ Իսրայելի տվյալներով՝ ապրիլի 6-ին Լիբանանից երկրի հյուսիսի վրա արձակվել է 34 հրթիռ, որոնցից 25-ը ոչնչացվել է։  Հարվածներն իրականացվել են հրեական գլխավոր տոներից մեկի՝ Պեսախի ժամանակ։ Սա ամենամեծ էսկալացիան էր 2006 թվականին Իսրայելի և Լիբանանի միջև պատերազմից հետո: ՄԱԿ-ի UNIFIL-ի խաղաղապահ առաքելությունը հայտարարել է, որ ավիահարվածներից հետո Իսրայելը և Լիբանանն, այդուհանդերձ, չեն ցանկանում պատերազմ։ «Երկու կողմերն էլ ասել են, որ պատերազմ չեն ուզում»,- ասել է առաքելության ներկայացուցիչը։