Չինաստանը չի սատարում ՌԴ-ի ներխուժումն Ուկրաինա և Ղրիմի ու Դոնբասի բռնակցումը․ ԵՄ-ում Չինաստանի մշտական ներկայացուցիչ

Չինաստանը չի աջակցում Ռուսաստանի ներխուժումն Ուկրաինա, ռազմական օգնություն չի ցուցաբերում Մոսկվային և չի ճանաչում ուկրաինական տարածքների, այդ թվում՝ Ղրիմի և Դոնբասի բռնակցումը։ Այս մասին The New York Times-ին տված հարցազրույցում ասել է Եվրամիությունում Չինաստանի Ժողովրդական Հանրապետության մշտական ​​ներկայացուցիչ Ֆու Ցուն։

Լրագրողների չինացի դիվանագետի հետ զրուցել են  Ֆրանսիայի նախագահ Էմանուել Մակրոնի և Եվրահանձնաժողովի նախագահ Ուրսուլա ֆոն դեր Լեյենի հետ նրա հանդիպումից առաջ, որոնք ապրիլի 5-ից եռօրյա այցով Չինաստանում են։ Ըստ պարբերականի՝ հարցազրույցում Չինաստանի մշտական ներկայացուցիչը փորձել է «հեռանալ» Մոսկվայից՝ հայտարարելով, որ կողմնակի քննադատները սխալ են մեկնաբանել Պեկինի և Մոսկվայի հարաբերությունները։

Մասնավորապես, Ֆու Ցուն մեկնաբանել է Մոսկվայի և Պեկինի հայտարարությունը երկրների միջև «անսահման բարեկամության» մասին 2022 թվականի փետրվարին՝ Ուկրաինա ռուսական լայնամասշտաբ ներխուժման նախօրեին։

«Առանց սահմանների բարեկամությունը ոչ այլ ինչ է, քան հռետորաբանություն»,- ասել է դիվանագետը։

Նրա խոսքով՝ Չինաստանը չի քննադատել ռուսական ներխուժումն Ուկրաինա, քանի որ հասկացել է ընդդեմ ՆԱՏՕ-ի պաշտպանական պատերազմի մասին ՌԴ-ի հայտարարությունն ու կարծում է, որ «իրական պատճառներն ավելի բարդ են», քան ասում են արևմտյան առաջնորդները։

Մեկնաբանելով Ֆու Ցունի հայտարարությունը՝ Կրեմլում նշել են, որ ղեկավարվում են ՉԺՀ առաջնորդ Սի Ցզինպինի և ՌԴ նախագահ Վլադիմիր Պուտինի բանակցությունների «բովանդակությամբ ու ոգով», որոնք տեղի են ունեցել Մոսկվայում 2023 թվականի մարտին։

«Նրանց փոխըմբռնման ամբողջ համատեքստը շարադրվել է երկու փաստաթղթերում, երկու հայտարարություններում, որոնք ընդունվել են ռուս-չինական բանակցությունների արդյունքներով։ Դրանք շատ բովանդակալից են և հենց դրանք են լիակատար կերպով լուսաբանում հարցերի ամբողջ շրջանակը, որոնք գտնվում են համատեղ օրակարգում»,- ասել է ՌԴ նախագահի մամուլի քարտուղար Դմիտրի Պեսկովը։

Տաթև Ֆռանգյան