12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Իրանը և ՌԴ-ն ավարտում են իրանական Ռեշտն ու ադրբեջանական Աստարան կապող երկաթուղու կառուցման գործարքը
Քաղաքականություն
05.04.2023 | 20:00
Իրանը և Ռուսաստանը վերջնական համաձայնագիր են կնքելու Ռեշտ-Աստարա երկաթուղու նախագծի ավարտի վերաբերյալ մինչև հաջորդ իրանական ամսվա վերջը (2023 թվականի մայիսի 21-ը)։ Այս մասին հայտնել է թեմային ծանոթ աղբյուրը, գրում է Mehr գործակալությունը։
«Երկրի ամենակարևոր միջանցքը ներկայում Հյուսիս-Հարավն է, իսկ ամենակարևոր երկաթուղային նախագիծը՝ Ռեշտ-Աստարան»,- ասել է Իրանի երկաթուղու, նավահանգիստների և օդանավակայանների ընդլայնման գծով տրանսպորտային ենթակառուցվածքի ընկերության շինարարության և զարգացման փոխտնօրեն Աբբաս Խաթիբին։
Նա նշել է, որ Իրանի և Ռուսաստանի միջև լուրջ բանակցություններ են ընթանում Ռեշտ-Աստարա երկաթգծի և՛ ֆինանսական, և՛ տեխնիկական մասերին մասնակցելու, ինչպես նաև Հյուսիս-հարավ միջանցքի ավարտի վերաբերյալ։ Խաթիբին հավելել է, որ մինչև մայիսի 21-ը Ռուսաստանի հետ համաձայնագիրը վերջնական տեսքի կբերվի։
Պատասխանելով նախագծում Ադրբեջանի ներկայության մասին հարցին՝ Խաթիբին նշել է, որ բանակցություններ են ընթանում, և Իրանը փորձում է երկկողմ համաձայնագիր կնքել Ռուսաստանի հետ, որից հետո Ադրբեջանի մասնակցությամբ այդ համաձայնագիրն արդեն կդառնա եռակողմ։
Հավելենք, որ դեռ նախորդ տարվանից ռուսական մամուլում տեղեկություններ էին տարածվում, որ Մոսկվան մինչև 2030 թվականը կարող է 1,5 միլիարդ դոլար հատկացնել «Հյուսիս-Հարավ» միջազգային տրանսպորտային միջանցքի զարգացման համար, որը Ռուսաստանն Իրանի միջոցով կապում է Հնդկաստանի հետ: Նշվում էր, որ «Ռուսական երկաթուղիներ» ընկերությունը մասնակցելու է Ադրբեջանի Աստարա քաղաքից մինչև Իրանի Ռեշտ քաղաք երկաթգծի կառուցմանը և Իրանում Գերմսար-Ինչե-Բուրուն գծի (495 կմ) էլեկտրաֆիկացմանը:
Այս առնչությամբ Ռուսաստանը, Իրանն ու Ադրբեջանը ակտիվ բանակցություններ էին վարում։ Սակայն վերջին ամիսներին Թեհրանի և Բաքվի հարաբերություններում լուրջ լարվածության ֆոնին դեռևս պարզ չէ, թե նախագիծն ինչ ընթացք կունենա։
Էմմա Չոբանյան
