Դոնալդ Թրամփը մեկնաբանել է իր դեմ հարուցված քրեական գործը

ԱՄՆ նախկին նախագահ Դոնալդ Թրամփն իրեն մեղավոր չի ճանաչել բոլոր 34 հոդվածներով առաջադրված մեղադրանքներում։ Այս մասին նա ասել է Ֆլորիդայի հարավում գտնվող իր կալվածքում՝ Մար-ա-Լագոյում ելույթ ունենալիս, ուր վերադարձել է Նյու Յորքից, գրում է VOA-ն։

«Սա ընտրություններին միջամտություն է։ Երբեք չեմ մտածել, որ Ամերիկայում նման բան կարող է լինել։ Միակ հանցանքը, որ ես գործել եմ, մեր երկրի անվախ պաշտպանությունն էր այն ոչնչացնել ձգտողներից»,- ասել է Թրամփն իր կողմնակիցներին։

Մինչ այդ, Թրամփը մոտ մեկ ժամ անցկացրել է Մանհեթենի դատարանի դահլիճում, ուր կամավոր ներկայացել է դատարան՝ 2016 թվականին Սթորմի Դենիելսին լռության համար գումար վճարելու մեղադրանքով։

Թրամփը հերքել է բոլոր մեղադրանքներն ու հայտարարել իր անմեղության մասին։ Նա ազատվել է կալանքից առանց որևէ սահմանափակումների։

Ֆլորիդա վերադառնալու ճանապարհին Truth Social-ում հրապարակված գրառման մեջ Թրամփը հայտնել է, որ ելույթ է ունենալու տեղական ժամանակով 20:15-ին, իսկ դատական ​​նիստն անվանել է «ցնցող»:

«Յուրաքանչյուր իրավաբանության ոլորտի փորձագետ ասում է, որ այստեղ գործ չկա»,- գրել է նա՝ հավելելով, որ ոչ մի անօրինական բան չի արել։

Երեքշաբթի Նյու Յորքի Մանհեթենի քրեական դատարանում Թրամփին մեղադրանք է առաջադրվել 34 հոդվածով՝ գործնական փաստաթղթերը կեղծելու համար, որոնք կապված են երկու կանանց, այդ թվում՝ դերասանուհի Սթորմի Դենիելսին վճարումների հետ՝ իրենց ենթադրյալ կապի մասին լռելու համար: Բացի այդ, Մանհեթենի դատախազ Էլվին Բրեգի խոսքով՝ նախկին նախագահը և նրա հանցակիցները 2015 թվականին պայմանավորվել են ստեղծել «բացասական տեղեկատվությունը» ճնշելու սխեմա՝ 2016 թվականի նախագահական ընտրություններում հաղթելու համար:

Թրամփին մեղադրել են նաև Նյու Յորքի քաղաքային դատարաններին և դատախազներին ուղղված սպառնալից նամակների, ելույթների և սոցիալական ցանցերում գրառումների համար։ Նախկին նախագահն իրեն մեղավոր չի ճանաչել։ Քաղաքական գործչի փաստաբան Ջո Տակոպինան կարծում է, որ իր պաշտպանյալին առաջադրված մեղադրանքներն անհիմն են։

Տաթև Ֆռանգյան