16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Լաչինի միջանցքի փակ հատվածում ադրբեջանցիների սադրիչ քայլերի հետևանքով արցախցի 4 կնոջ ինքնազգացողությունը վատացել է․ նրանց կյանքին վտանգ չի սպառնում
05.04.2023 | 09:50
Ադրբեջանի կողմից նախնական պայմանավորվածությունը խախտելու և Լաչինի միջանցքի արգելափակված հատվածում Ստեփանակերտ վերադառնալ փորձող արցախցիների մուտքն արգելափակելու հետևանքով 4 կնոջ ինքնազգացողությունը վատացել է, որոնք ՌԴ խաղաղապահ զորակազմի միջնորդությամբ և ուղեկցությամբ տեղափոխվել են Ստեփանակերտի հիվանդանոց։
Ինչպես հայտնել են Արցախի Հանրապետության առողջապահության նախարարությունից, հիվանդանոցում բոլորին ցուցաբերվել է պատշաճ առաջին օգնություն, և նրանք այս պահի դրությամբ գտնվում են բժիշկների հսկողության տակ։
Նրանց կյանքին որևէ վտանգ չի սպառնում:
Ավելի վաղ Արցախի ոստիկանությունը հայտնել էր, որ ՌԴ խաղաղապահների ուղեկցությամբ քաղաքացիական անձանց (այդ թվում ` կանայք, երեխաներ ու տարեցներ) Գորիս քաղաքից Ստեփանակերտ տեղափոխելիս` Շուշի քաղաքի մերձակայքում ադրբեջանցիները կանգնեցրել են ավտոմեքենան և արգելել են վերջիններիս մուտքը։ Միջադեպի հետևանքով արցախցի 4 կանանց ինքնազգացողությունը վատացել է։ Խաղաղապահները վերջիններիս շտապ օգնության մեքենայով տեղափոխել են «Հանրապետական բժշկական կենտրոն։
Արցախի մարդու իրավունքների պաշտպան Գեղամ Ստեփանյանն էլ հայտնել էր, որ ՌԴ խաղաղապահների ուղեկցությամբ Գորիսից Ստեփանակերտ են ուղևորվել 27 քաղաքացիական անձինք, սակայն Ադրբեջանը, խախտելով նախնական պայմանավորվածությունը, արգելել է նրանց մուտքն Արցախ։ ՌԴ խաղաղապահների բանակցություններն ադրբեջանցիների հետ արդյունք չեն տվել, և 23 անձ վերադարձել է Գորիս։
