05.11.2024 | 12:09
ԱԳՆ-ն հաստատում է՝ Ադրբեջանի դեսպանը սպառնացել է ՀՀ դեսպանին, Կիևը պատրաստ է Մոսկվայի հետ բանակցել. ԼՈՒՐԵՐ
Իսպանիայի վարչապետից հետո Չինաստան են այցելում Մակրոնը, ֆոն դեր Լեյենը և Բորելը
Քաղաքականություն
04.04.2023 | 20:51
ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Ժոզեպ Բորելը հաջորդ շաբաթ կմեկնի Չինաստան։ Այս մասին նա ասել է Բրյուսելում կայացած ճեպազրույցում, գրում է Korrespondent-ը։
Քաղաքական գործիչը հիշեցրել է, որ վերջերս Չինաստան է այցելել Իսպանիայի վարչապետ Պեդրո Սանչեսը, իսկ այս շաբաթ Չինաստան կմեկնեն նաև Ֆրանսիայի նախագահ Էմանուել Մակրոնը և Եվրահանձնաժողովի նախագահ Ուրսուլա ֆոն դեր Լեյենը։
«Ես ևս կմեկնեմ հաջորդ շաբաթ»,- ասել է Բորելը՝ հավելելով, որ Ուկրաինայում ՌԴ գործողությունների վերաբերյալ Պեկինի դիրքորոշումը «կվճռի նրանց հարաբերությունների որակը»։
Նա հայտնել է, որ Բրյուսելում ԱՄՆ պետքարտուղար Էնթոնի Բլինքենի հետ իր բանակցությունների ընթացքում քննարկել են Չինաստանի դերը Ուկրաինայում Ռուսաստանի պատերազմի համատեքստում։
«Մենք ակնկալում ենք, որ ՄԱԿ-ի Անվտանգության խորհրդի մշտական անդամը հանդես կգա կանոնների վրա հիմնված աշխարհակարգի օգտին: Իսկ Չինաստանը բարոյական պարտականություն ունի նպաստել արդար խաղաղությանը»,- ասել է Բորելը:
Ավելի վաղ Եվրահանձնաժողովի ղեկավար Ուրսուլա ֆոն դեր Լեյենը հստակորեն հայտարարել էր, որ Չինաստանի հետ ԵՄ հարաբերությունները կախված կլինեն Ուկրաինայի պատերազմի վերաբերյալ Պեկինի դիրքորոշումից։
Տաթև Ֆռանգյան
